Penyakal ngambu projek perintah BN

0

Raban tu suah madah ngagai peranak rumah panjai ngumbai BN nadai meri projek

SRI AMAN: Menteri Muda Pemansang Menua Pesisir enggau Pengawa Berumah Sarawak Datuk Francis Harden Hollis ngenataika serabana diri bekaul enggau pengawa parti penyakal nyangkal projek pemansang ke dipejalaika pengari rayat Barisan Nasional (BN).

Ku iya, raban penyakal enda patut nyangkal ba genap iti projek perintah baka ke udah dipeda ngelingi sida taja pan nya ukai ari projek ke diberi sida (parti penyakal).

“Anang meh nyangkal semua projek ke diberi perintah BN. Taja pan projek nya mit tauka besai. Nya projek ke diberi pengari rayat BN,” ku iya bejaku ba aum media pengudah tembu pengawa nyuaka geran perintah ungkup sitak Kunsil Nengeri (DUN) Simanggang ke diatur di Opis Parti Sa’ati Rayat Sarawak (SUPP) Simanggang, ditu lemai kemari.

“Aku bisi bulih penerang, raban penyakal ke udah ngelawa sekeda rumah panjai lalu nguji ngambi gambar sereta mansutka ba suratkabar madah semua projek ke dipejalaika nya ari piak penyakal.

“Iya ke temu aku, bedau bisi siti pan, projek ari piak penyakal dipejalaika ba menua tu tang semina ke ayan nya projek ari perintah BN,” ku iya ke mega Kaban Kunsil Nengeri (ADUN) Simanggang.

Harden mega ngelalau rayat menua tu enda mendingka jaku tuduh penyakal laban sida semina deka ngulihka sukung nyerumba enggau pengawa bepilih besai Ke-13 (PRU13) ti deka diatur enda lama agi.

“Kitai nemu, bala penyakal udah bekimpin ngagai kandang mengeri enggau menua pesisir mantaika mayuh macham isu baka projek ngaga palan napis ai di Bayai ti udah dikemendar sereta benung dipejalaika diatu.

“Baka nya mega projek jalai alun ba sekeda rumah panjai di Ulu Paku, Ulu Undop mega udah dikemendar lalu deka berengkah dipejalaika ba awak ke semak tu.

“Projek andau ba sitak Ulu Paku, Ulu Undop enggau sekeda endur pelilih Sri Aman mega mayuh udah digaga lalu bisi nya udah dikemendarka perintah,” ku tandu iya.

“Tu meh projek ari perintah BN tang ukai ari parti penyakal munyi ku dipadah sida sebedau tu” ku iya.

Nya alai, ku iya, arapka rayat enda muntang ningaka jaku asut penyakal laban udah dipeda sengenda genap projek ke bisi ayan ba mata endang diberi perintah BN.

Sama bisi datai ba pengerami nya Kunsilor Sawing Sumar.

Ba pengerami nya mega, Harden bisi nyuaka tujuh kepin chek ngagai empat buah Gerempung Apai Indai enggau Pengajar (PIBG), 2 gerempung bukai enggau sebuah gerija beungkus RM55,000.