Wong Judat enda matak penemu ke suba

Posted on July 23, 2012, Monday

Iya deka ningkilka diri ari SPDP ngambika masuk SWP sereta napi Salang di Julau

KANOWIT: Kaban Kunsil Nengeri (ADUN) sitak Meluan, Wong Judat ngenyitka semua bepun ari penerang iya ke madah deka ningkilka diri ari Parti Demokratik Progresif Sarawak (SPDP) ngambika tau masuk Sarawak Workers Party (SWP) kenaka 31 July tu.

Bejaku ngagai media sepengudah tembu pengerami ‘Pentas Rakyat’ ba Kanowit malam Hari Enam tu tadi, iya madah enda matak diri ari ti deka bediri ba sitak parlimen Julau ngelaban chalun Barisan Nasional (BN).

“Kenaka 30 July tu, aku deka betemu enggau presiden parti Tan Sri William Mawan enggau sapit iya Datuk Seri Tiong King Sing di Kuala Lumpur alai aku deka nerangka singkang aku ngagai seduai lalu ningkilka diri ari parti hari siti. Pemutus aum kami tiga maya nya ila enda deka matak pemutus aku. Nadai pekara ulih ngubah runding aku lalu nadai orang ulih nagang aku,” ku iya.

“Aku deka bediri di Julau nengah tikit SWP enti (Datuk Joseph) ngenanka penuduk iya. Aku deka ngenataika peminta rayat di Julau ti deka meda chalun peranak asal bediri ngarika sida lalu aku deka ngerembaika projek pemansang enggau adil,” ku iya.

Ditanya sekalika iya deka nesal enggau pemutus nya alai semua penguntung tauka pengelantang ti diterima iya ari BN deka diketu, iya nyaut: “Nama penguntung? ungkup aku? aku enda ngereja tu ngambika tau kaya. Aku udah beumur 48 taun, ukai nembiak ke beumur 17 taun, nadai kebuah aku tau nesal.”

Nyaut tanya bukai:”Aku ukai gelaban SPDP tauka parti bukai dalam serakup BN. Aku enggau SWP nyukung perintah nengeri sereta perintah besai. Kami kaling BN lalu semina ngelaban PRS.”

Pemutus iya ti deka ningkilka diri ari SPDP ngujungka Mawan kediri ba kunsil nengeri ngarika parti nya lalu Judat meri jaku :”Enti iya ngasaika diri sunyi, iya tau masuk SWP. Tajapia aku deka madah dia, Tan Sri (Mawan) enggau Datuk Seri (Tiong) sereta kaban parti ke bukai chukup manah begulai enggau aku ditambah agi SWP sigi kaling SPDP, kitai mengkang bekaling lalu tu deka digenggam teguh.

Iya chukup arap ulih ngalahka Salang:”Aku 110 persin perchaya ulih menang.”

Judat udah ba penuduk Meluan nya sepengelama 3 rengga. Iya menang ba taun 2011 nengah tikit ngatika diri sebedau begempung dalam SPDP ba taun 2003. Diatu iya mangku pengawa mandal Presiden SPDP.

Presiden SWP Larry Sng, lebuh bejaku ngagai media madahka iya ngelaluka singkang Judat alai parti baru nya diatu bisi dua iku pengari kaban kunsil nengeri nambah George Lagong ba Pelagus.

Larry madah parti nya deka mantaika manifesto ke deka dikena maya bepilih besai parlimen tu lalu deka nyabung chalun ti ulih menang. Dulu agi ari nya maya ke bejaku

ba Pentas Rakyat, Judat bejaika Salang, alai iya nuduh sapit menteri nya enda ngereja pengawa enggau adil.

Urung 2,000 iku orang datai ngemataka ‘Pentas Rakyat’ ti diatur ba Pasar Kanowit alai panggau pemerindang malam nya dikerami artis tebilang menua tu.

<< Previous Entry - Next Entry >>