Home - Utusan Borneo - Berita Iban - KuchKitingan: BN enggau PR aruh nejuka parti ari nengeri tu empu ba PRU13
KuchKitingan: BN enggau PR aruh nejuka parti ari nengeri tu empu ba PRU13
Posted on July 24, 2012, Tuesday
DIPENYADI: Kitingan bejadika website DLT www.drluhattechnology.
com. Bisi ayan Elli enggau Patau.
KUCHING: Chairman State Reform Party (STAR) chapter Sabah Datuk Dr Jeffery Kitingan udah mesau parti nasional ari Barisan Nasional enggau Pakatan Rakyat ngambika sida meri penuduk ngagai parti menua tu empu dalam pengawa bepilih besai ti ke-13 (PRU13) tu ila.
Ku iya ba sitak parlimen, parti nasional udah bisi 166 penuduk di Semenanjung enggau siti di Wilayah Persekutuan Labuan nya kebuah sida aruh ninggalka 56 penuduk di Sabah enggau Sarawak ungkup parti ari menua tu empu.
“Nama kebuah sida nguasa semua enti sida ngelala otonomi kitai (Sabah enggau Sarawak). Enti sida majak, nya reti enda bebasaka hak kitai. Udah ga baka nya patut kitai ngasuh sida betanding ke alai sida kering,” Ku iya bejaku ngagai pemberita udah ke bejadika Palan Pesaka Borneo ba Taman BDC Stampin ditu malam Hari Minggu tu tadi.
Sarawak bisi 31 bengkah sitak parliamen, seraya Sabah 25. Enda sama enggau di Sabah, BN Sarawak nadai parti ari Semenanjung tang Pakatan Rakyat di nengeri begempung di baruh PKR, DAP enggau PAS.
Lebuh dipinta mansut penemu bekaul enggau pengawa bepilih tu ila, iya madah, senario 2008 ke alai 165 penuduk di Semenanjung pechah antara Barisan enggau Pakatan nyangka deka ngulang baru seraya Sabah enggau Sarawak nyadi penentu.
Enti parti bepusat ba nengeri tu ulih ngeraup 56 penuduk, iya pechaya Sabah enggau Sarawak ulih besai agi hak bejaku baka ke endang bisi ditulis dalam sempekat Malaysia.
Kitingan, ke mega chairman kededua Borneo Heritage Foundation (BHF) enggau United Borneo Front (UBF), bis nemuai dua hari ngagai nengeri tu. Iya bekejang ngagai Kota Kinabalu kemari.
Berebak engau nya, chairman DLT Group of Companies Dr Elli Luhat, ke bempu Palan Pesaka Borneo madah, iya bedau enggau masuk STAR taja pan iya udah ngelaluka Jeffery bejadika pengerami nya.
Elli, empai lama ke udah bisi nebah diri deka betanding enti enda di Hulu Rajang, Baram, ku Jeffery ke dikangau setegal BHF ukai setegal kebuah politik.
Pengerami nya mega dikena bejadika website DLT www.drluhattechnology.com.
<< Previous Entry - Next Entry >>
