Obesiti majak nambah di Sarawak sereta patut diputar lengkas: Taib

by Chris Bishop. Posted on July 24, 2012, Tuesday

NGEMERAT PENGERAI: Taib enggau Anne nerima cek RM50,000 ari Yayasan Sarawak ti disuaka Abu Bakar (empat kanan).

KUCHING: Penusah orang ke ngembuan pemerat tubuh ngelui ke patut tauka dikum­bai ‘Obesiti’ ba Sarawak di­peda majak nambah lalu patut diputar enggau lengkas.

Kepala Menteri Pehin Sri Abdul Taib Mahmud madah, atur nerenak pemereti ngintu pengerai sereta pemerat tu­buh diri patut berengkah ba raban nembiak mit.

“Ba runding aku, pengawa nerenak penau tauka pemereti ngintu pemerat tubuh diri ngambika enda ngelui ari patut berengkah ba raban nembiak mit.

“Ngintu pemerat tubuh ngambika mengkang ba tikas ti patut tau nyeliah seseiku kitai ari napi penyakit tung­kul ati tauka ngidap penyakit bukai ti suah nyadi ketegal obesiti,” ku iya.

Ari peda aku, mayuh agi kes obesiti diatu enti dibanding enggau dulu menya, tandu iya.

Taib mansutka jaku tu lebuh dikerandau pemberita sepen­gudah nerima cek RM50,000 ari Yayasan Sarawak ti diberi ngagai Sarawak Heart Foun­dation ke alai iya (Taib) nyadi chairman gerempung nya.

Ku Taib, tu meh chara ti disadang chukup engke­man dikena nyeliah diri ari obesiti alai kitai meransang mensia mayuh mereti lalu enda ngelakka obesiti majak nambah.

“Penanggul obesiti dipeda majak nambah ba mayuh bengkah menua nyengkaum Amerika, Australia sereta menua bukai.

“Aku nemu kitai enda ulih nagang pekara tu nambah, tang kitai ulih ngadu atur ti tau ngurangka penyampau orang ti napi obesiti,” ku iya.

Diatu, Sarawak Heart Foundation (SHF) udah ng­atur kaul enggau Universiti Malaysia Sarawak (UNIMAS) sereta National Nutrition Society ngepunka program guna ngintu pemerat tubuh diri ngambika enda ngelui ari ke patut.

Program ti dipejalaika dalam kandang setaun (2012) deka ngemeratka raban nem­biak mit enggau raban apai indai senentang chara ngambi pemakai ti chukup zat.

Bela bisi ngulu pengawa nya ba ringkat 22, Wisma Bapa Malaysia, Direktor Yayasan Sarawak Mohamad Abu Bakar Marzuki, Tukang Pekara Wang SHF Dato Anne Ting enggau orang bukai.

<< Previous Entry - Next Entry >>

Comments are closed.