Home - Utusan Borneo - Berita Iban - Salang nadai pengerawan napi Judat
Salang nadai pengerawan napi Judat
Posted on July 24, 2012, Tuesday
Peneka iya hak demokratik, rayat deka nentuka pengari ti dikedeka sida
KUCHING: Kaban Parlimen Julau ke mega Sapit Menteri Pemadah, Penyambung enggau Main Asal Datuk Joseph Salang Gandum madah, iya enda rawan napi Kaban Kunsil Nengeri Meluan Wong Judat maya pengawa bepilih besai ti deka datai.
JOSEPH SALANG
Diperitaka kemari dia Wong udah ningkilka diri ari SPDP lalu masuk SWP ketegal ti deka nyatup Salang ngerebut penuduk parlimen Julau.
“Pemutus iya ti deka ngerebut penuduk parlimen Julau nyatup aku enda ngerawan aku,” ku Salang madah ngagai The Borneo Post kemari.
Ku Salang, peneka Wong nya sigi hak demokratik iya lalu rayat deka nentuka ni bagi pengari ti dikedeka sida iya.
“Tang, tuliska enggau adil ba surat berita. Enti pemberita nerima berita tauka ulah aku ke enda manah nitihka tuduh Wong, kita patut mansik dulu sekalika berita nya amat tauka enda, laban enti enda pekara tu tau nyarutka runding rayat,”ku iya.
Salang mega ngansak rayat bela mansik ulah sereta penatai Wong sebaka ke udah diadu ba iya.
“Rayat patut nemu ulah sereta penatai Wong lalu nya nyengkaum tikas setipikit ti dikembuan iya ketegal rayat bisi hak nemu pejalai pengidup iya,”ku Salang ti ngembuan degree ba pekara ekonomi ari Western Maryland College, USA sereta MBA ari Teheran University.
Iya mega nyangkal tuduh Wong ti madah iya ngalihka projek ti udah diungkupka ngagai Julau ke menua bukai.
“Pekara nya sigi nadai kala nyadi. Kati ka aku ulih ngalihka projek enti aku nadai kuasa ba atur nya? Semua projek perintah besai dikuasa pemesai opis pemansang nengeri enggau JKR,”ku iya.
Salang mega mansutka penerang dia mayuh duit agih udah diungkupka ngagai Julau kenyau ari iya ke nyadi kaban parlimen sitak nya sepengelama 3 renggat.
“Enda ulih dikira penyampau duit udah diagih ungkup pemansang ba Julau tang chukup meh bukti baka ke dipeda udah tembu projek tiang pemanchar, jalai sereta projek bukai ti diadu nengah MRP,”ku iya.
Ba pengawa bepilih parlimen ke udah, Salang menang ngalahka chalun ngati kediri Josephine Mawat nengah majoriti 2,688 undi.
<< Previous Entry - Next Entry >>
