Home - Utusan Borneo - Berita Iban - State Reform Party mega ngining sitak Mas Gading
State Reform Party mega ngining sitak Mas Gading
Posted on July 24, 2012, Tuesday
NAGIH PENYUKUNG: Jeffrey (tengah) bekunsika tundi iya maya randau nya. Bela bisi dalam gam-bar nya Dr Patau (kanan) enggau Anek (kiba).
BAU: Taja pan maya pengawa bepilih besai apin ditemu tang State Reform Party (STAR) udah nyendiaka diri napi pengawa nya ba sitak parlimen Mas Gading sereta nirika menira ba sekeda endur kandang jalai Bau enggau Lundu.
Ba randau ke diatur di Genturung Pendiau Stenggang ditu kena Hari Enam minggu nyin kemari, parti nya mantaika pengingin ati deka bediri ba sitak ke tebal diuan bansa Bidayuh lalu ketuai parti nya mega madahka sida ngundi Barisan Nasional tauka sebarang parti ti bepalan ari menua Semenanjung.
Randau ke diatur ba Dewan Gawai Stenggang (Bori Gawea) digulu numbas iya pemayuh ke datai ningaka licha ari chairman STAR Sabah, Datuk Dr Jeffrey Kitingan, chairman mendam parti nya, Dr Patau Rubis enggau chairman pampang Mas Gading Patrick Anek Uren.
Mensia mayuh ke ngulu randau nya kemari mega diingatka 22 Julai, iya nya maya menua Sarawak merintah diri sebedau menua Malaysia ditempa, 49 taun ke menya.
Anek, ke bejaku mungkal randau nya madah, pengawa ke diatur sida ukai kimpin tang kena mantaika bala ketuai enggau parti ngagai bala pengundi ba Genturung Pendiau Stenggang sereta sekeda Genturung Pendiau bukai ba kandang menua nya.
“Sekali tu, STAR deka bediri ba sitak Mas Gading ke ngembuan 23,000 iku pengundi ke tabal agi ari bansa Bidayuh,” ku Anek, ke kala nyadi Kaban Parlimen sitak Mas Gading MP ari taun 1974 nyentuk ke taun 1986 sereta mega pengari rayat sitak Tasik Biru ari taun 1974 nyentuk ke taun 1983 ari baruh parti SNAP.
Iya mega madahka diri deka nyadi chalun STAR ungkup sitak nya ba pengawa bepilih besai tu ila sereta madahka Kaban Parlimen STAR enda tau enda bejaku negika ungkup rayat Sarawak dalam parlimen ngambika ulih nyapai juluk ati ba Borneo Agenda.
“PKR enggau DAP nya ari menua Semenanjung. Anang ngumbai sida deka ngedut rayat Sarawak taja pan enti sida menang sereta megai kuasa,” ku iya.
Jeffrey, ke nyadi ketuai STAR Sabah kenyau parti nya dipenyadika din taun siti nyin kemari, minta rayat meri STAR peluang sekali tu.
“Kitai patut menang sekali tu. Nadai agi maya bukai laban kitai nadai agi peluang udah tu ila,” ku iya madahka STAR patut bisi penuduk kenyau ditumbuhka 16 taun ke udah.
Dr Patau, ke nyaut ba pengawa betanya saut, mengkang ngelalaika chalun STAR ungkup sitak Mas Gading sereta madahka STAR nadai penanggul milih sesapa bediri ngarika parti nya dia.
Sitak Mas Gading nyadi angat endar laban BN enggau penyakal sama bela bisi chalun ke ulih menang bediri ba sitak nya.
Ari Barisan, chalun ke dikearapka ulih menang ari Parti Demokratik Progresif Sarawak (SPDP) enggau Kelab BN udah betemu enggau mensia mayuh sereta ngelakuka diri. SPDP madahka diri deka nyabung manuk baru, tang Kelab BN mengkang nyabung pengari rayat sitak nya ke diatu, iya nya Datuk Dr Tiki Lafe.
Pakatan Rayat, DAP enggau PKR agi berunding enggau pangan diri milih chalun ke engkeman ngarika penyakal bediri ba sitak nya.
Sitak nya deka diperebutka mayuh parti laban parti SNAP pan bisi mantaika pengingin ati deka bediri dia, lalu baka nya mega chalun ngatika. Mayuh bala pemerati politik madah, penyakal deka bediri dia sereta beambi ulih ari penyarut ke nyadi ba chalun BN ke sama bela berebut deka bediri ba sitak nya.
<< Previous Entry - Next Entry >>
