Ulah baka nya suah nyadi dalam politik

by Chris Bishop. Posted on July 24, 2012, Tuesday

Pengawa Judat ningkil diri ari gempung parti dalam BN, nya pekara mit, ku Taib

KUCHING: Kepala Menteri Pehin Sri Abdul Taib Mahmud enggai bejurai panjai senentang singkang ADUN Meluan Wong Judat ti netapka pemutus ningkilka diri ari gempung parti dalam Barisan Nasional(BN) lalu masuk SWP.

TAIB

Seraya ke ngaku pekara baka nya suah nyadi dalam dunya politik, Taib ke mega Chairman BN nengeri madahka nya semina kes mit aja.

Lebuh dipinta pengarang berita meri komen senentang singkang Judat nya, iya nyaut: “Nama kebuah minta komen aku senentang pekara mit baka nya?”

Taib mansutka jaku nya sepengudah nerima cek RM50,000 ari Yayasan Sarawak ti beri ngagai Sarawak Heart Fondation ba ringkat 22, Wisma Bapa Malaysia ditu, kemari.

Wong Judat ke mega Mandal Presiden SPDP malam Hari Enam tu tadi mansutka penerang alai iya udah netapka pemutus deka ningkilka diri ari Parti Demokratik Progresif Sarawak (SPDP) lalu masuk Sarawak Workers Party (SWP).

Nitihka riput ari surat kabar kemari, Judat deka betemu enggau presiden parti Tan Sri William Mawan sereta sapit iya Datuk Seri Tiong King Sing di Kuala Lumpur kena 30 July tu alai iya deka nerangka singkang ningkilka diri ari SPDP.

Judat disadang sah begempung enggau ADUN Pelagus George Lagong dalam SWP kenaka 31 July tu.

Entara kebuah Judat ningkilka diri ari SPDP ketegal ti deka nyatup MP Julau Datuk Joseph Salang (PRS) alai iya netapka deka bediri nengah tikit SWP ba pengawa bepilih besai ti ke-13 (PRU13) tu ila.

Entara jaku Judat ti bisi dirikut ba surat kabar kemari: “Aku deka bediri di parlimen Julau nengah tikit SWP ngelaban Salang. Aku 110 persin perchaya ulih ngalahka Salang, Aku deka ngenataika peminta rayat di Julau ti deka meda chalun peranak asal bediri ngarika sida lalu aku deka ngerembaika projek pemansang enggau adil.”

<< Previous Entry - Next Entry >>