Pengawa iya ningkilka diri ari SPDP lalu masuk SWP baka ke nadai ngembuan kredibiliti ti tegap nyadi kaban politik
KUCHING: Kaban Kunsil Besai Parti Pesaka Bumiputera Bersatu (PBB), Abdul Karim Rahman Hamzah nyema ke ulah Kaban Kunsil Nengeri (ADUN) Meluan, Wong Judat baka main kayu tiga.
Nya berindik ari Judat ti ningkilka diri ari Parti Demokratik Progresif Sarawak (SPDP) lalu masuk Parti Pengereja Pengawa Sarawak (SWP).
Taja pia ku iya ti nyadi Menteri Muda Pengawa Berumah enggau Pemansang Nembiak madah, rayat ti nentuka penuduk enggau kuing pengari rayat nya ba pengawa bepilih ila.
“Dalam konteks Barisan Nasional (BN) kitai patut nitihka prinsip enggau juluk parti, tang ukai nitihka peneka diri,” ku iya bejaku ngagai pemberita ditu, kemari.
Abdul Karim madah pemutus Judat ti pansut ari parti nya nunjukka iya nadai ngembuan kredibiliti ti tegap nyadi kaban politik ke mentas enggau rayat.
Bebendar iya madah pemutus Judat nya tentu nadai disukung rayat lebih agi penyukung BN ba sitak (Meluan) ke dipegai iya.
“Ngelalau iya ti nyadi bakih, aku ngarapka Judat ulih meratika gaya politik enggau berunding panjai sebedau ngaga pemutus ningkilka diri ari parti (SPDP),” ku iya.
Berebak enggau tu iya madah semua pengari rayat bisi atur parti ti patut dititih sebedau mindah ngagai parti bukai.
“Nyadi pengari rayat, iya (Judat) patut ulih meretika nama dalam ati rayat ti diarika sebedau ngelengka sida,” ku iya.
Nambahka nya Abdul Karim madah pemutus Judat nya nadai ngeruga BN tauka SPDP ti nyikap diri napi Pengawa Bepilih Besai Ke-13 (PRU 13) ti deka datai.
“Iya (Judat) semina ADUN, ukai menteri tauka tuai ba renggat tinggi, nya alai pemutus ngemansutka diri ari parti nadai ngeruga BN,” ku iya.
Hari Minggu apin lama (di Kanowit), Judat nadai bepampul madahka diri ngelengka penuduk ba SPDP kena ke 31 Julai tu nagmbika ulih masuk SWP.
Judat madahka diri nadai begilik penemu enggau pemutus iya ti deka enggau berebutka kerusi di sitak Parlimen Julau ba PRU Ke-13 ila betapi enggau pemangku BN kediatu (Sapit Menteri Pemadah, Penyambung enggau Main Asal Datuk Joseph Salang Gandum).
Dulu ari nya Karim nerima penemuai Raban Indu SPDP Pampang Pending bekaul enggau program ‘Night With P.195 & P.196) Friends’ ke betuaika Chairperson Pengatur Program Wendy Earnest Sadan.
Bela datai Raban Nembiak Parti Sa’ati Rayat Sarawak (SUPP) ti diuluka Tuai Raban Nembiak Tan Kai.