Home - Utusan Borneo - Berita Iban - Penemu ACP Shafie ke madahka Sibu likun disakal ADUN Dudong
Penemu ACP Shafie ke madahka Sibu likun disakal ADUN Dudong
Posted on July 31, 2012, Tuesday
SIBU: Kaban Kunsil Nengeri (ADUN) Dudong Yap Hoi Liong kemari nyakal sereta enda ngemanaka penerang ke diberi Kepala Polis Sibu ACP Shafie Ismail ka madahka Bandar Sibu likun agi enti dibanding enggau Klang Valley, Kuala Lumpur enggau Johor.
Yap udah nyadi kaban politik kedua dalam kandang minggu tu mantaika pengasa enggau pengeringat ba senentang penerang dipansut polis.
Minggu nyin tadi, MP Bintulu Datuk Seri Tiong King Sing mantaika penemu ke sebaka, madahka Shafie aruh nemu bida pemayuh tubuh mensia nguan tempat tu enti deka ngaga banding.
Tiong, ti mega chairman Kelab Penyukung BN enggau Kepala Komiti Liaison SPDP Tengah Sarawak, madah, enti sema penyai di Sibu udah dipentin, nama kebuah iya agi nerima sebana ari peranak Sibu.
Yap kemari minta Shafie nerangka penyai ke suah nyadi ke udah ngenakutka mensia mayuh.
ADUN Dudong madah, iya baru aja nerima tiga bengkah sebana sentang penyai ulah ba sitak iya.
“Iya ke baru tu, penchuri udah nyerungkai sebuah rumah di Jalai Sukun tiga kali bejurut. Aku mega nerima sekeda kompelin ari peranak Jalai Maludan bekaul enggau penyalah beserungkaika rumah.”
Yap madah, polis aruh ukai semina mutarka penyalah ke bebesai aja, tang mega ke mit, laban kelalu mayuh penyai ulah ke mit mega tau ngenakutka sida.
Iya ngenang kes bechurika pistol enggi MP Hulu Rajang Billy Abit Joo nya tebungkar amat penyai ulah taja pan polis mujur nemu senyata nya dalam timpuh sejam.
“Tu ngayanka gaya pemerat penyalah di Sibu. Aku arapka polis deka enchelapka ati mensia mayuh.”
Yap madah, pengawa bechurika kerita mega balat nyadi diatu, iya ngelalau orang ke beempu kerita bejejimat.
Iya madah, mensia mayuh aruh bekempit enggau polis ba pengawa munaska penyalah.
Iya besangka gaya penyai ulah udah majak nambah setegal ekonomi ke enda manah di Sibu, madahka tu udah ngumbuk mensia ngereja penyai, nyengkaum enchuri.
Ba penerang ke dipansut Datuk Seri Tiong minggu nyin tadi, iya madah, enda asi polis muji diri ba pemanah sida ke udah mentin jenayah seraya mensia mayuh mantaika penakut sida.
Iya madah, mensia ukai semina deka mending berita manah ba pengawa nagang penyai, sida deka nemu enggau silik berapa bengkah bunuh udah diputar.
<< Previous Entry - Next Entry >>
