Pengari DAP ngasuh chairman MDB ensiban

Posted on July 31, 2012, Tuesday

NGERUGA PENGERAI: Gaya uras ti nyau betimbun ba Kampung Serikin enda dibuai MDB nitihka maya ke udah ditetap.

Riput pasal uras ke apin temu pengamat enda patut dikena nyadi modal bejaika perintah

KUCHING: Penanggul uras ke enda dibuai nitihka maya ti udah ditetap, ke ngepunka  sebana rayat ba Kampung Serikin enda patut nyadi modal raban penyakal bejaika perintah.

Chairman Opis Kunsil Pelilih Mit Bau (MDB), Simon Japut enda lantang ati enggau ulah pengari DAP ti rindu ngemesaika pekara ke bedau temu pengamat lalu patut betanya ngagai MDB dulu.

Ku iya, raban penyakal sigi rindu bejaika orang gawa perintah nengah tuduh ke munyi nya tang iya ke amat, isu nya semina pekara mit lalu ulih diputar nengah chara berandau.

“Sapa Mordi DAP? Aku enda ngelala orang ke benama nya,” ku iya lebuh dipinta meri komen senentang penerang ti dipansutka pemantu kaban parlimen Bandar Kuching senentang tuduh MDB enda ngambi uras nitihka maya ti udah ditetapka ba Kampung Serikin.

“Enti pekara tu amat nyadi, rayat ke diau dia patut datai betemu enggau MDB ngambika tau diputar.

“Ukai nengah chara ngemansutka terus ba surat kabar enggau enda dipansik pengamat dulu, tu ba runding aku ukai chara ti manah,” ku iya seraya ke madah enggai kiruh ke tuduh ke enda ulih diterima runding nya.

Ba kaul ke sebaka, Mordi nengah pesan jaku pandak (SMS) madah, iya udah nganjung surat ngagai Chairman MDB ke mega Pemesai Opis Pelilih Mit Bau.

Nitihka riput ba surat kabar kemari, pengawa ngambi uras ba genturung pendiau nya ke urung 20KM penyauh ari pasar Bau enda diadu nitihka maya ke udah ditetapka lalu balat meri penanggul ngagai temuai ti datai bebelika barang lebih agi maya ujung minggu.

Enda lantang ati enggau penanggul ke ditapi nya, rayat ngambi jalai muntang ngenataika sebana ngagai pengari DAP ngambika tau nyaup mutarka isu nya.

MDB ngeletakka bayar RM2.00 sehari ngagai genap iku orang dagang peranak Indonesia lalu dalam timpuh setaun, sepenyampau RM76,000 dikumpul MDB.

<< Previous Entry - Next Entry >>