Site Last Updated 4:56 pm, Tuesday

Saspek enda sengapa timbak tang nyubuk orang ke disaran

by Rengenyan Labang. Posted on August 1, 2012, Wednesday

Kepala Polis Sarawak ngelalau mensia mayuh enda irau ati bekaul enggau kes timbak ke bisi nyadi ba menua tu

KUCHING: Bepelasarka tiga kes timbak mati ti udah nyadi, penimbak (saspek) enda sengapa timbak tang nyubuk nyawa orang ke endang disaran.

Nya alai Kepala Polis Sarawak Datuk Acryl Sani Abdullah ngelalau mensia mayuh enda kelalu irau ati.

Iya madahka pekara ti nyadi di menua tu enda sebaka enggau ti nyadi di menua luar baka di Amerika Syarikat, Sweden enggau kebukai ti meli senapang lalu sepeneka timbak, nadai orang disaran sereta nadai kebuah.

“Aku ngelalau orang mayuh ngambika enda kelalu irau ati laban penimbak (saspek) nya bisi orang disaran, amat mekuh sereta enda sengapa timbak.

“Sida (penimbak) nemu sapa ti ditaga sereta nemu nama kebuah diri ngereja pengawa nya,” ku iya.

Acryl mansutka penemu iya lebuh dikerandau pengarang berita pengudah ngulu pengerami Hari Bujang Berani ti diatur ba tengah laman Dewan Kunsil Negeri Lama ditu, pagi kemari.

Tiga kes timbak mati di nengeri tu nyadi di Kuching, Sibu enggau Miri.

Nitihka penerang iya, kes sebedau tu penimba kengena senapang patah enggau pistol, lalu kes ke baru ngena pistol revolver.

Berebak enggau tu mega Acryl ngelalau mensia mayuh ngambika meri kerejasama ngagai polis bekaul enggau tiga kes timbak ti udah nyadi di menua tu.

Kebuah pia ku iya laban polis diatur ngumpul penerang ke ulih nyadi kena nukuka orang ti dipelaba ngereja penyalah.

“Nya alai nyentuk ke diatu aku amat ngarapka bantu enggau penerang ari orang mayuh, enti nyema bisi ninga tauka nemu penerang ti ulih mantu polis bejalaika pansik sereta ngelala orang ti dipelaba bisi kaul enggau kes tu tau madah ngagai polis,” ku iya.

Nyempulang Acryl lebuh dikerandau pengarang berita, sapit iya Dato Law Hong Soon.

Print Friendly

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Comments are closed.