SIBU: Sitak tu deka bisi sebuah agi Kelinik 1Malaysia ke diperambu digaga ba Taman Soon Hup/Taman Permai kena nambahka penyampau tiga iti kelinik ditu.
Menteri Pekara Wang II Dato Sri Wong Soon Koh madah, pekara tu mandangka Sibu sitak ti pemadu mayuh ba Sarawak bisi Kelinik 1Malaysia.
“Taja pan baka nya kitai ngarapka kelinik baka tu mengkang digaga baru lebih agi ba sitak Kunsil Nengeri (DUN) Dudong baka ba Sibu Jaya,” pia ku iya madah ngagai pengarang berita, kemari.
Dulu agi ari nya, iya bisi nemuai ngagai palan alai ngaga projek Kelinik 1Malaysia ba Taman Soon Hup/Taman Permai ditu.
Bela bisi nyempulang Wong iya nya, Pemesai Opis Pengerai Sibu Dr Muhamad Rais Abdullah, Direktor Kompeni Soon Hup Ting Chii Hua enggau Injinia ngatur projek nya Tang Mee Huong.
Wong ke mega Menteri Kunsil Menua enggau Pemansang Raban Bansa madah projek nya deka belabuh digaga tengan bulan Ogos tu.
“Kelinik tu asil ari bantu Kompeni Soon Hup enggau ungkus RM300,000 lalu bekenaka tiga ngagai empat bulan tembu enti udah dikemendarka perintah digaga ba palan tu.
“Palan tu genturung pengentap pendiau ti pemadu mayuh iya ke dikembuan 3,000 ngagai 4,000 buah rumah lalu diuan pupu raban bansa. Kelimpah ari nya, kelinik tu mega deka mai penguntung ngagai rumah panjai ke besemak,” ku iya ti mega Kaban Kunsil Nengeri (ADUN) Bawang Assan.
Maya ditanya nama kebuah kelnik tu digaga taja pan besemak enggau Sepital Sibu, ku iya, sepital semina nerima kes ke berat enggau ngenyit aja.
“Beduduk ari tu kitai ulih ngurangka agi penusah sekut ba sepital ti ngelama tu bisi nerima sida ke pedera renga aja.
“Nya alai sida ke bisi sakit enda tentu raya ulih berubat ditu lalu semina kes ke berat aruh ngelawa sepital besai,” pia ku iya sambil meri terima kasih ngagai opis pengerai laban ngemeratka pengerai rayat.
Ku Wong madahka baru, penyampau Kelinik 1Malaysia ke majak nambah nya mandangka perintah semampai deka ngangkatka tikas pengerai pengidup rayat.
Naka ke diatu Sibu udah bisi Kelinik 1Malaysia ba Rejang Park, Sungai Bidut enggau Teku.