KUCHING: Gerempung Pengelikun Rama (Perkeso) deka mayar duit pinchin ninting bulan ‘Faedah Orang Tanggungan’ ngagai waris orang ke bebadi mai nyawa maya penusah bilun engkabang labuh di Sg Lingga/Sg Triso, Sri Aman empai lama ke udah.
Sapit Ketuai Eksekutif Perkeso Dato Dr. Mohammed Azman Aziz Mohammed madah, bayar nya diberi ketegal penusah nya nyadi maya sida bekereja lalu nitihka atur skim penusah kereja.
“Tu atur ti udah ditambah dalam Pekeso enggau juluk meri bantu proaktif ngagai orang ti udah dituntung penusah.
“Kitai enda nganti waris raban tu datai ngagai opis Pekeso tang kitai datai ngusung sida iya,” ku iya.
Ku iya, atur tu diadu ba semua opis pekeso serata menua ngambika tau bejalaika tanggung pengawa engau lebih efektif, lengkas sereta engkeman lalu nentuka semua ti begunaka tulung nerima bantu ke patut.
Dulu ari nya, Azman nyuaka bayar ungkup pengawa ngubur penyampau RM1,500 ngagai tiap waris ba opis Wisma Perkeso ditu, kemari.
Datai nerima bayar faedah nya, waris Siti Khuzaimah ke diarika apai iya Annuar Musaddad Razali sereta indai iya Hashimah Fadzil, waris Peter Ato Mayau iya nya balu iya Agnes Batang sereta Henry Lo diambi balu iya Leo Chin Nee.
Ba kaul ke sebaka, Azman madah dalam timpuh Januari nyentuk ke Jun taun tu di Kuching, Perkeso udah mayar ngagai 675 kes bebadi ke udah diriput.
Penyampau bayar enggau semua macham ungkup ba Sarawak ti nyengkaum semua 2,204 kes manggai RM59 juta.