Home - Utusan Borneo - Berita Iban - Kami enda nagang pemansang
Kami enda nagang pemansang
by Wilfred Pilo. Posted on August 5, 2012, Sunday
KUCHING: Semelah 137 iku peranak Genturung Pengentap Pendiau Iban Stampin bisi nyain sebengkah petisyen ke dituju ngagai perintah nengeri minta diketuka pengawa mindah hak tanah ke mungkur sekula anak mit, balai gempuru, rumah gerija enggau padang bol ngagai kompeni.
Peranak dia mega ngapil ngagai perintah meri tanah tu ngagai JKKK Kampung Stampin ngambika bisi dikena nembiak redak ke nguan Kampung Stampin.
Sapit Chairman Komiti Pemansang enggau Pengelikun Genturung Pendiau (JKKK) Dennis Sungkor madahka surat petisyen ke ngundan tanda jari redak dia deka dianjung ngagai perintah nengeri enda lama agi ngambika perambu mindah hak tanah nya ungkup pemansang pengawa dagang diketu.
“Naka ke diatu nadai wakil ari kompeni tauka otoriti udah datai betemu enggau peranak ditu bekaul enggau tanah ke deka dipindah hak,” ku Dennis bejaku ngagai The Borneo Post pengudah ke peranak dia besainka pengawa nyukung petisyen nya ba balai gempuru ditu kena lemai Hari Empat tu tadi.
Iya nambahka, perengkaguna tu udah nguntungka peranak Genturung Pengentap Pendiau Stampin lebih ari 20 taun ke udah lalu kami ngarapka semua tu enda dikeruga setegal perengkaguna semampai dipeguna peranak ditu.
Dennis madahka peranak dia nyukung petisyen laban ati sida balat irauka berita madahka tanah nya deka dipindahhak ngagai kompeni ke ngujungka perengkaguna nya deka direrak.
Iya nerangka peranak mega irau ati laban tanah ke deka dipindahhak nya tanah NCL (Native Customer Land) enggi genturung pendiau nya tang perintah baka ke ngembuan penemu bebida.
“Kami udah niki ngagai Opis Pengerejister Tanah Kuching lalu dipadahka pengawa mindahhak nya mengkang dipejalaika,” ku iya.
Dennis madahka peranak ditu enda ngenggaika pemansang tang sida gagit nyema sida ke ngembuan otoriti duduk sesama bejuraika pekara tu setegal sida enggai lenyau tanah sereta perengkaguna ke diberi perintah empu ngagai sida.
Berebak enggau nya, Kaban Kunsil Nengeri (ADUN) Kota Sentosa Chong Chieng Jen lebuh ke dikerandau madahka iya bisi mantu sida (Genturung Pengentap Pendiau Stampin Iban) ngaga surat petisyen ke dituju ngagai perintah nengeri.
Iya madahka peranak aruh ngetanka hak sida nyangkal kompeni ke deka ngeluska rumah gerija, balai raya, sekula anak mit enggau padang bol.
“Perengkaguna tu ungkup semua peranak ditu lalu enti semua utai tu nyau nadai ila, nadai meh dipenggau ila,” ku tambah iya.
Iya ngarapka pekara nya ulih diputar ngambika semua piak kelebih agi peranak ditu ke udah nguan menua ditu kenyau ari jeman Brooke kelia terus ngasaika pengelantang enda mai penusah sereta selipi.
<< Previous Entry - Next Entry >>
