KUDAT: Kiginumu 30 munggui bot notorob naanu minanampasi di sontimungan pulis ontok kinantakan di minsusuab tadau Koonom nakatalib.
Luguan Pulis Watas Kudat, DSP Dawi Ossen minoboros boogian diolo minaganu laang soira nokotorimo kopoilaan mantad tulun ginumuan ih minboros do kiharo bot norulun om nababak id Daat Panbatu, Pulau Balambangan.
Ka dau, tumanud do mantad kopoilaan dino, kiikira jam 4.30 minsusuab, pulis pinapanau do ‘Ops Gelora’ ih kapaamung do sontimungan 20 upisor om puru Pulis Marin Kudat songowian duwo tinan bot kuminaa doid tampat kinantakan.
“Sinansagan do pulis guminuli kawagu sabap kooyuon tawan au osonong, kalapas id jam 6 sosodopon ontok tadau ih iso’i, gaab manampasi pinotilombus sundung pia au osonong kooyuon tawan sabap kikotumbayaan munggui nokotoguang kobolingkangan okurangan kokorui taakanon om minoi doid Lok Simpol, Pulau Balambangan.
“Ontok suab tadau dino kiikira jam 4.30 kosuabon, tinimungan pulis marin ih linuguanan di Inspektor Mohd Noor Abd Latif minaya nuluw Lok Simpul miampai minamanau kakod solinaid duwo jam montok rumikot doid tampat kinantakan,” ka dau id iso kopoilaan konihab.
Soira nokorikot do hilo, noilaan do pulis oh kiginumu 30 munggui bot nababak dino kaamung tondu om tangaanak id kooyuon ongohuyan om au noh opurokis.
Koinsanai munggui kalapas dino nowit doid daat Lok Simpol om nonuan kouhupan taakanon om tiinumon di Tinimungan Pulis Marin Kudat. Koinsanai munggui nowit minomoguno do Bot mimpanau PA 8 kuminaa doid Lolokito Marin Kudat.
Tumanud Dawi, Bot ML Fatimah Jacimin minamanau mantad Pulau Simunul, Tawi-Tawi, Polipin di ontok 23 Julai nakatalib om pakaayan id Pulau Balabac.
“Ontok id pindalanan, bot dino minumbaya id Pulau Mangsee di ontok 28 Julai nakatalib om kiikira jam 6 sosodopon, kalapas dino pinolombus do pindalanan pakaayan id Pulau Balabac.
“Bot kikotumbayaan nokotoguang kobolingkangan injin om kooyuon tawan au osonong om daat kiumbak kosigampot kolongkouon 5 meter. Nakakandai nogi bot do kaantaban namot id pndalanan om norulun doid kadaaton Malaysia.
“Juragan bot dino kalapas diri minaganu laang montok manampasi om pinakaayan doid tindal ih poindoros. Au nogi koilo ih juragan do tindal ih tindalon diri nopo nga Pulau Balambangan,” ka dau.
Koinsanai munggui kaampai mantad 25 kusai kiumur id pialatan 19 gisom 55 toun om duwo tulun tondu, tolu tangaanak tondu kiumur id pialatan 1 om 13 toun.
Munggui kalapas dino pinataak doid tinimungan Wulan Sumilau Taragang Malaysia Watas Kudat montok laang potilombus dino.