Home - Utusan Borneo - Berita Iban - KDS1M nyaup ngelempungka belanja: Fatimah
KDS1M nyaup ngelempungka belanja: Fatimah
Posted on August 8, 2012, Wednesday
FATIMAH
KUCHING: Kad Diskaun Siswa 1Malaysia (KDS1M) dikearap ulih mantu nembiak menua tu teulihka pelajar ke tinggi nengah pengelempung tanggung belanja.
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah madah, tuju KDS1M ngambika ulih mantu nembiak bekelimat enggau belanja.
“Suba bisi diskaun lebih ngagai tambang bilun, tang diatu nyauka semua perengka ke dikena belajar ulih beli ngena kad diskaun nya.
“Kad diskaun tu mega ulih nyaup ngelempungka belanja apai indai ke kurang penatai pemisi,” ku iya madah lebuh dikerandau Utusan Borneo ditu, kemari.
Lebuh ditanya ngagai iya enti sema kad diskaun nya muntang disalah kena, iya madahka diskaun diberi nitihka tusun perengkaguna barang ke diberi diskaun.
“Semadi meh kad diskaun nya dikena ngurangka rega barang biasa, tang KDS1M bisi tuju barang ke deka dibeli,” ku iya.
Kena 2 Julai tu tadi, Sapit Menteri Besai, Tan Sri Muhyiddin bejadika ‘Kad Diskaun Siswa 1Malaysia’ (KDS1M), kena mantu nembiak palan pelajar tinggi betapi enggau kos rega barang ke niki.
Muhyiddin madah, kad nya deka meri penguntung ngagai urung 1.5 juta nembiak di palan pelajar tinggi perintah enggau peribit ti dipegai Opis Menteri Pelajar Tinggi enggau penyampau diskaun entara 5-60 persin.
Ari jaku iya ti diambi nengah portal berita Malaysian Innsider madahka penemu ngaga kad nya, dibantai di Aum Opis Kunsil Penemu Pelajar Kebangsaan (MPPK) kena bulan November taun nyin tadi, lalu dalam timpuh enam bulan, penemu nya diambi kira,” ku iya lalu madah perambu nya digaga dalam timpuh ke pandak.
Muhyiddin madah baru, atur tu mega ngayanka perintah mendingka penemu undergraduate lalu meri kelala penemu sida iya ke digaga enggau likun.
Urung 51 buah kompeni udah besetuju deka meri diskaun nengah KDS1M ke nyengkaum bup, perengka tulis, baju, pemakai, barang IT, servis pengerai, nyengkaum kena kemisi.
Muhyiddin nambah, perintah betati mantu nembiak nyengkaum nyendiaka peluang pengawa enti sida tembu belajar ila.
“Nengah Bidang Pugu Ekonomi Menua (BEUN) enggau numbuhka portal Career For You, perintah betatika peneka nembiak enggau tuai-tuai undergraduate,” ku iya.
Ex-Kaban Kunsil Pengari Nembiak Universiti Pendidikan Sultan Idris (UPSI), Samuel Sila Mathew Unjah madah, pemeri KDS1M ngagai undergraduate ngelantangka ati sida di serata menua Malaysia lebih agi dalam pemendar kunsil tu ngulihka kad diskaun dikena ngelempungka kos belajar.
“Maya nya kami merambu mega meri diskaun ba tambang bilun pulai mansang ke nembiak Sabah enggau Sarawak ke belajar di Semenanjung, enggau nembiak ari Semenanjung ke belajar ari Sabah enggau Sarawak,” ku iya ke mega Mandal Presiden Gerempung Anak Sarawak Semenanjung.
“KDS1M nyadi singkang ke pengabis manah, ngayanka perintah betatika penemu undergraduate.
“Kami mega ngarapka jemah ila, KDS1M deka dikemendarka ke tambang bilun nembiak ari Sabah enggau Sarawak, ke Semenanjung lalu ari Semenanjung ke Sabah enggau Sarawak,” ku iya.
Entara kedai ke bisi nyereta program KDS1M sereta udah ngerejister diri enggau Opis Menteri Pengawa Dagang Dalam Menua, Gerempung Kerejasama enggau Pekara Bebeli Barang (KPDNKK) di serata menua tu iya nya, Kedai Bup MPH, Koperasi Dewan Bahasa dan Pustaka Berhad, Bata, klinik, optometri enggau cheremin mata, KFC, A&W, The Chicken Rice Shop, Station One Café, Hotel Tune, saloon sereta perengka pengias diri ke dipilih, produk IT, Mydin enggau mayuh kedai bukai.
<< Previous Entry - Next Entry >>
