Home - Utusan Borneo - Berita Iban - KPN enggau KPM disaran beserakup bejalaika pengawa meresa pengerai
KPN enggau KPM disaran beserakup bejalaika pengawa meresa pengerai
by Rengenyan Labang. Posted on August 8, 2012, Wednesday
TERIMA KASIH: Mohd Zaki nyuaka tepa ngagai Fatimah, kelai meri terima kasih ngagai perintah ne-ngeri ti beratka raban ATM, seraya diperatika (ari kanan) Rosey enggau Chuat. — Gambar Mohammad Rais Sanusi
Fatimah minta dua bengkah opis menteri tu besaup meresa pengerai ngeli ungkup rayat di menua pesisir ke nadai disikap kelinik ngeli
KUCHING: Menteri Pengintu Pengelantang, Orang Indu enggau Pemansang Ruang Bilik meri perambu ngagai Opis Menteri Ngetan Menua (KPN) enggau Opis Menteri Pelajar (KPM) ngambika beserakup meri servis meresa pengerai enggau pengerai ngeli di menua pesisir.
Menteri nya, Datuk Fatimah Abdullah madah servis nya ulih dipejalaika nengah projek Blue Ocean Strategy (BOS) ti dikemeranka Raban Soldadu Malaysia (ATM).
“Ngarapka Opis Menteri Pelajar enggau Opis Menteri Ngetan Menua ulih beserakup (meri servis meresa pengerai ngeli) kena napi peminta guna lebih agi ba sekula primari menua pesisir ke nadai disikap kelinik ngeli.
“ATM nengah projek Blue Ocean Strategy mega tau meri servis meresa pengerai enggau pengerai ngeli ngagai rumah panjai enggau genturung pendiau di menua pesisir ke nadai kelinik ngeli tauka sepital ti nadai lutur ngeli,” ku Fatimah seraya magi penemu madah servis nya endang bisi peminta ari menua pelilih mit ke nadai lutur tauka kelinik ngeli.
Iya mansutka penemu nya lebuh ti bejaku enggau dikerandau ba pengerami nyuaka kuih raya ngagai raban pengelikun ari perintah nengeri, ti diatur ba Dewan Bukavu, Kem Penrissen Batu 8 ditu, kemari.
Bejaku baru Fatimah madah, meresa pengerai enggau meresa ngeli di menua pesisir endang nerima sambut ti manah lebih agi kandang menua ti nadai disikap enggau kelinik ngeli tauka sepital ti nadai lutur ngeli.
“Ambika banding, pengawa meresa ngeli ti kala diatur ba Genturung Pendiau Sungai Kut nerima sukung ti manah ari orang mayuh ba Genturung Pendiau Sungai (Muara & Tengah) enggau Genturung Pendiau Kebuaw di Batang Igan.
Berebak enggau tu, Panglima 1 Divisyen, Mejar Jeneral Datuk Mohd Zaki Mokhtar lebuh dikerandau madah, ATM ukai semina nyaga pengelikun tang mega beratka pengerai rayat.
Iya madah, kena nukuka rayat menua pesisir bepengerai, ATM deka majakka program meresa pengerai enggau ngeli di menua pesisir.
“Taun nyin kemari (2011) kami meresa pengerai nyengkaum meresa pengerai ngeli ngagai lebih 35,000 iku rayat menua pesisir, lalu program tu deka seruran diatur,” ku iya.
Mohd Zaki madah, nengah Blue Ocean Strategy meri peluang ngagai ATM mantu perintah besai enggau nengeri ngenataika bantu ngagai rayat menua pesisir nyengkaum bekaul enggau pengerai.
Nyempulang Fatimah datai ngagai pengerami nya kemari, Menteri Muda Pengintu Pengelantang Robert Lawson Chuat, Menteri Muda Pemansang Ruang Bilik enggau Pelajar Anak Mit Rosey Yunus sereta Direktor Biro Raban Indu Norjanah Razali.
<< Previous Entry - Next Entry >>
