Home - Utusan Borneo - Berita Iban - Pengawa ngungkup Kuih Raya tanda basa ngagai Raban Soldadu Malaysia: Fatimah
Pengawa ngungkup Kuih Raya tanda basa ngagai Raban Soldadu Malaysia: Fatimah
by Rengenyan Labang. Posted on August 8, 2012, Wednesday
SELAMAT HARI RAYA: Fatimah (tujuh kiba) ngarika perintah nengeri nyuaka 2,300 bungkus Kuih Raya ngagai Mohd Zaki (lima kanan) ngarika ATM. — Gambar Muhammad Rais Sanusi
KUCHING: Perintah nengeri ngungkupka 2,300 bungkus kuih Hari Raya ngagai Raban Soldadu Malaysia (ATM) di Sarawak, kemari.
Menteri Pengintu Pengelantang, Orang Indu enggau Pemansang Ruang Bilik Datuk Fatimah Abdullah madah, nya kelai basa sereta temegah ati ngagai raban tu ti nyaga pengelikun sereta pengelantang rayat enggau menua.
“Maya kitai ngintu pengerami Hari Raya sekeda ari raban soldadu bejalaika tanggung pengawa nyaga pengelikun menua di tasik, darat enggau langit.
“Ketegal sida ti bejalaika pengawa kitai ulih berami enggau lantang sereta likun,” ku iya.
Iya mansutka jaku nya lebuh bejaku ba pengerami nyuaka kuih Hari Raya ngagai raban pengelikun ari perintah nengeri.
Pengerami nya kemari diatur ba Dewan Bukavu, Kem Penrissen Batu 8, ditu.
Kelimpah ari Paglima 1 Divisyen, Mejar Jeneral Datuk Mohd Zaki Mokhtar ti nerima Kuih Raya nya, Ketua Staf Markas 1 Divisyen Kolonel Ya’cob Samiran ngarika Soldadu Darat (TD), Komander Pangakalan Udara Kuching Kolonel Jumali Salamat ngarika Soldadu Langit Diraja Malaysia (TUDM) sereta Pegawai Memerintah Pejabat Perwakilan Tentera Laut Kuching Leftenan Komander Mohd Zainuddin Manaf ngarika Soldadu Tasik Diraja Malaysia (TLDM) mega nerima bungkus nya.
Mohd Zaki, dalam jaku pengelalu iya meri terima kasih ngagai perintah nengeri ti seruran berat sereta ingatka ATM ke nyaga pengelikun menua.
Iya madah pemeri ari perintah nengeri nya ukai semina besai reti ngagai ATM tang mega pengingat sereta basa ti diberi ngagai ATM lebih agi ke gawa di nengeri Sarawak.
“Pemeri kuih raya tu seiti ari basa ngagai ATM ti benung gawa maya pengerami, lebih agi ngagai raban kami ti benung bejalaika pengawa di menua pesisir (bejalaika projek Blue Ocean Strategy),” ku iya Mohd Zaki.
Meri kuih maya pengerami Hari Raya ngagai raban pengelikun ti gawa (maya pengerami) endang sebengkah program ti diatur Biro Indu nengeri ninting taun.
Bisi ngulu pengerami nya, Menteri Muda Pengintu Pengelantang Robert Lawson Chuat, Menteri Muda Pemansang Ruang Bilik enggau Pelajar Anak Mit Rosey Yunus sereta Direktor Biro Wanita Norjanah Razali.
<< Previous Entry - Next Entry >>
Advertisement
