Home - Utusan Borneo - Berita Iban - Perintah besai ngeamatka semaya, ku Kloni
Perintah besai ngeamatka semaya, ku Kloni
by Jacqueline David. Posted on August 8, 2012, Wednesday
LANTANG ATI LABAN ULIH MAYAR LALUH: Lukis artis gamal Gerija St Luke, Sri Aman, ke udah tembu sereta udah dipenyadi kena 10 Disember 2011.
KUCHING: Bepelasarka Pugu Penemu ti keterubah ke ditulis dalam ‘Rukun Negara’, Pechaya ke Tuhan, menua tu ngembuan raban bansa ke dikemendar mekuh jalai pengarap diri.
Beamatka penemu ti seruran sinu ke rayat lebih agi peranak menua ke ngemeranka pengarap kristian lebih agi raban Anglikan ari Gerija St Luke Sri Aman enggau St Augustine Betong patut bendar temegah ketegal saup perintah besai penyampau RM1 miliun diungkupka ngagai kededua gerija nya.
Chairman Projek Gerija St Augustine Nelson Kloni madah, pemayuh ungkup diberi perintah besai nya ngayanka pengamat baka ke ditusun ba ‘Rukun Negara’ ti keterubah iya nya rayat di menua tu ngembuan hak nitihka jalai ajar pengarap diri.
“Kami balat gaga sereta puas ati ketegal penelap perintah besai ngungkupka kami RM500,000 dikena kami ngemesai sereta ngemanahka Gerija St Augustine,” ku Kloni seraya meri besai terima kasih ngagai Menteri Besai ketegal penyiru iya.
Iya bejaku munyi nya ngagai pengarang berita ari Utusan Borneo ensana pengudah ngulu atur pengawa nerima chek ari Perintah Besai ti disuaka Menteri Pengeraja Asal enggau Rampa Menua Dato Sri Dougls Uggah ba Opis Sapit Kepala Menteri, Datuk Patinggi Tan Sri Alfred Jabu di Wisma Bapa Malaysia, ditu.
Ku Kloni, ungkup nya deka dikena ngaga sebuah kompleks sepiak gerija ba apak ke nyengkaum sebuah dewan parish dua ringkat (kediatu semina seringkat aja), opis paderi parish, gerempung indu, nembiak enggau sekeda perengka guna bukai.
“Enti maya bisi pengerami mutang endar nyendiaka urung 1,500 penuduk alai besembiang. Lalu ba dewan parish nya ila, ba baruh nya tau alai ngatur pengerami, ringkat atas bisi bilik konferens ke nyendiaka urung 200-300 penuduk,” ku iya nambah, jemah ila gerija nya tau alai ngatur aum besai gerija diosis enti sema sida iya deka baum luar ari Kuching.
Gerija St Luke, sebuah gerija ke pengabis tuai di menua tu (digaga dalam taun 1837) di Sabu, Sri Aman, betapi penusah lebuh gerija nya angus laban api kena 15 Disember, 2002.
Berindik ari nya, sebuah gerija baru didirika kena 3 Jun 2011 ngena ungkus RM2.5 juta ba apak ke sama di Jalai Munggu Sabun tang lebuh nya gerija nya betapi penyuntuk duit urung RM300,000 utang ba kontrektor (baka ke dipadah Archdeacon Venerable of Central Sarawak, Chimbie Bunsie baka ke ditabur dalam surat kabar The Borneo Post ba taun 2011.
Gerija St Luke ke bisi urung 10,000 iku kaban ari raban bansa Iban ke baru dibuka kena 10 Disember 2011.
Penulung Paderi ke diatu Reverend Jackson Jarau madahka pengaga ati sida iya laban diberi ungkup RM500,000 ulih Perintah Besai mantu gerija nya.
Ku Jackson, dikarap RM250,000.00 ari ungkup nya deka dikena mayar lun ke bedau abis bayar taja pen rumah gerija nya udah tembu.
“Pemeri ungup nya ke pemadu manah, ke sigi seruran dipinta sereta disampika kami ngelama tu,” ku iya lalu nambah pemesai gerija nya diatu ulih alai urung 1,000 iku orang besembiang ba gerija nya ke nyendia urung dua bansa jaku servis sembiang selang seminggu, dalam jaku English enggau Iban.
<< Previous Entry - Next Entry >>
Advertisement
