Home - Utusan Borneo - Berita Iban - Rayat aruh nyukung pemansang ke dibai perintah BN, ku Jacob
Rayat aruh nyukung pemansang ke dibai perintah BN, ku Jacob
Posted on August 8, 2012, Wednesday
UNGKUP RAYAT: Jacob (dua kanan) benung nyuaka chek ngagai Pastor Gerija SIB (dua kiba) seraya dikemataka Jabu (tiga kiba), Dennis (kiba) enggau Lihan (kanan).
Ngelalau peranak Lio Mato enda mendingka jaku penyakal ti ngasut sida enda nerima pemansang ke deka dipejalaika ba genturung menua nya
MARUDI: Sapit Menteri Dagang Antarabansa enggau Industri Malaysia Dato Jacob Dungau Sagan mantaika pengaga ati ngagai Sapit Kepala Menteri ke lalu nyadi Menteri Pemansang Menua Pesisir Datuk Patinggi Tan Sri Alfred Jabu anak Numpang laban bebendar ngemansangka rayat di menua Kedaya, Telang Usan.
Ku iya, Jabu mayuh mai pemansang baka ngagihka projek besai perengkaguna sereta insentif ungkup pengelantang pengidup rayat ke diau di Baram enggau Lio Mato.
Berindik ari nya, Jacob madah peranak menua nya aruh nyukung pemansang ke dibai perintah Barisan Nasional (BN) taja pan menua Ulu Baram enggau Lio Mato ulih dilawa nengah jalai darat sepengelama semilan jam.
“Nya alai, aku arapka rayat menua tu beterima kasih sereta ulih nyukung perintah BN laban semina BN aja ulih ngangkatka tikas pengidup kelebih agi ngagai raban ke kurang penatai pemisi,” ku Jacob.
Tandu iya, projek nanam paung getah ke diperambu Jabu ulih mai penguntung urung RM40,000 setaun (sebuah ruang bilik) tau mega ngangkatka tikas pengidup rayat ti bepenatai pemisi manggai ba taun 2020.
Dato Jacob ke mega Kaban Parlimen Baram bejaku munyi nya ba pengerami Betemu enggau Rayat ke diatur ba Kedaya Telang Usan, Kampung Lio Mato, apin lama tu tadi.
Pengerami ke dipenyadika Jabu nya bisi digulu Menteri Muda Perengkaguna Mensia Mayuh (Kuasa Karan enggau Perengka Penyambung) Datuk Stephen Rundi Utom, Kaban Kunsil Nengeri (ADUN) Telang Usan Dennis Ngau , Senator Dewan Rakyat Lihan Jok, Residen Miri Anthonio Kathi Galis enggau Sekretari Mendam Opis Menteri Betanam Betupi Datu Dr.Ngenang Janggu enggau Sapit Sekretari Menua Sarawak Dato Ose Murang.
Jacob nandu madah nyerumba enggau pengawa bepilih besai (PRU) ke-13 tu ila, rayat kelebih agi ba Ulu Baram anang mendingka jaku achuk penyakal ti semampai bejaika perintah BN ba atur pemansang ke diberi ungkup pengelantang rayat.
Ku iya, semua jaku petenah nya semina ngeruga runding ngambika rayat nyukung sida (penyakal) ba PRU tu ila.
“Perintah udah ngungkupka mayuh belanja dikena ngangkatka tikas pengidup rayat kelebih agi ba Ulu Baram. Nya alai, dikena ngubah pengidup rayat perintah enda begunaka kapak agi dikena nebang kayu besai tang ngena chinso.
“Nya alai, enti nadai sukung ari rayat bakani perintah ulih mai ubah kelebih agi ngagai rayat menua pesisir,” ku tandu iya.
Ba pengerami nya Jacob bisi ngagihka Projek Mit Pemansang Menua Pesisir (MRP) RM30,000 ngagai Biro Indu Lio Mato dikena ngaga opis enggau dapur rumah panjai.
Pia mega, Jacob bisi nyuaka geran RM5,000 ngagai Kelab Kaban Rampa Menua (RAS) SK Lio Mato enggau RM6,000 ungkup gerija Sidang Injil Borneo (SIB) Lio Matu.
<< Previous Entry - Next Entry >>
Advertisement
