Home - Utusan Borneo - Berita Iban - Rumah Kamarow andal nerima bantu ari perintah
Rumah Kamarow andal nerima bantu ari perintah
Posted on August 8, 2012, Wednesday
TEBABAK: Siti ari bilik ba Rumah Kamarow ditu udah tebabak perabung ketegal dipangka kudi, empai lama tu tadi.
SIBU: Peranak ba dua buah rumah panjai ke dipangka kudi empai lama tu tadi balat ngandalka bantu ari perintah nyaup penusah ti nuntung sida.
Penusah kudi keterubah nyadi kena 28 Julai tu tadi nuntung Rumah Kamarow di Machan, Kanowit ditu ti ngujungka lapan ari 21 pintu rumah panjai nya tebabak perabung.
Seiku ari bala ke bela dituntung penusah nya, Ngadi Kamarow, 40, madah nyentuk ke diatu sida apin nerima sebarang bantu.
Ku iya ketegal kudi nya, perabung rumah panjai sida pelanting urung 100 meter tegal dipangka ribut.
“Kami udah ngeriput penusah nya ngagai polis kelimpah mai pekara nya ngagai Opis Pengintu Pengelantang Raban Bansa (JKM) kena 29 Julai.
“Sepengudah nya, seiku pemesai ari JKM datai meda penusah ti nuntung kami tang iya semina meda aja,” pia ku iya maya betemu ba Opis Parti Keadilan Rayat (PKR) pampang Lanang di Jalai Pedada ditu, kemari.
Tandu iya, ketegal penusah nya mega sida napi pengerugi urung RM75,000.
Ngadi madah, naka ke diatu, sida agi ngenduh ba ensarau seraya nganti bantu ari opis ke bekaul.
Penusah tu mega nuntung tiga pintu bilik ba Rumah Eri di Jalai Tanggi Spur ditu tiga hari ke udah.
Beduduk ari pekara nya, Chairman PKR Lanang George Chen bela bisi nemuai ngagai dua bengkah rumah panjai tu.
Iya ngarapka perintah ulih lengkas mantu sida ke dituntung penusah nya.
<< Previous Entry - Next Entry >>
