Home - Utusan Borneo - Berita Iban - Waris penerima bantu JKM aruh ngeriput enti sema iya udah nadai
Waris penerima bantu JKM aruh ngeriput enti sema iya udah nadai
Posted on August 8, 2012, Wednesday
KUCHING: Waris ke nerima bantu ari Opis Pengintu Pengelantang Raban Bansa (JKM) dipinta ngeriput enti penerima bantu udah nadai tauka parai.
Menteri Pengintu Pengelantang, Orang Indu enggau Pemansang Ruang Bilik, Datuk Fatimah Abdullah madah, nya dikena nyeliahka bantu nya terus dipasuk ngagai akaun bank penerima.
“Endang bisi sekeda waris ruang bilik enda ngeriput pemarai penerima ngagai JKM, nya kebuah kami meresa baru status bantu setaun sekali. Nyema bisi tetemuka kes nya, bantu tekala nya deka diketuka lalu laluh nya patut dibayar pulai baru ngagai JKM tang nya ukai pekara ti senang diputarka,” ku iya.
Fatimah bejaku ngagai pengarang berita ba pengerami nyuaka 2,300 bungkus Kuih Raya ngagau Raban Soldadu Malaysia (ATM) ba Dewan Bukavu, Kem Penrissen Batu 8 ditu, kemari.
Bejaku baru iya madah, ulah sekeda pewaris ruang bilik ti enda ngeriputka pemarai penerima bantu nya ngujungka sekeda orang ti patut dibantu enda ulih nerima bantu.
Iya madah, JKM enda kala bechiping mantu rayat nengeri tu ke patut nerima bantu.
Berengkah ari bulan Januari ngagai Jun 2012, JKM udah ngungkupka belanja RM60.2 juta dikena meri macham bantu ngagai orang ti patut ke diberi ninting bulan.
Iya madah, enti nyema bisi kes, kitai deka mansik kena nukuka sekalika patut nerima bantu tauka enda.
“Kitai enggaika orang ti patut dibantu enda diberi bantu, lalu orang ti enda patut nerima bantu, pekara tu enda patut nyadi,” ku iya.
Bisi ngulu pengerami nya, Menteri Muda Pengintu Pengelantang Robert Lawson Chuat, Menteri Muda Pemansang Ruang Bilik enggau Pelajar Anak Mit Rosey Yunus sereta Direktor Biro Indu Norjanah Razali sereta Panglima 1 Divisyen, Mejar Jeneral Datuk Mohd Zaki Mokhtar.
<< Previous Entry - Next Entry >>
Advertisement
