KIMANIS: Umno om Barisan Nasional (BN) au insan mamajanji au otopot om kinopoilaan di Luguan Montiri Datuk Seri Najib Tun Razak kokomoi do talun alun Kota Kinabalu-Sindumin nopo nga iso kagu tanda ‘janji pinotopot’.
Puru Parlimen Sipitang, Datuk Sapawi Ahmad minoboros laang montok popoinggayo do ralan dino tantu noh do piandad-andad do rayat.
“Kikosianan tokou kopio miampai kobolingkangan ih notoguang do rayat om kinopoilaan di Luguan Montiri dino otopot kopio kopokito do Umno om BN okon mamajanji au otopot,” ka disio hiti konihab.
Sapawi sinolowot id ramai sungkai songowian Luguan Montiri id Sikul Pintangaan Kabansaan (SMK) Bongawan II minoboros, kobolingkangan ih notoguang do rayat amu mangan pologoso.
Ka disio ralan KK-Sindumin baino diti asasampit doulu noh soira orkot timpu karamaian om nogi timpu koundarangan sikul.
Tumanud disio, ralan dino nosiliu popiromut om ino okon nopo gunoon di momomoguno kinoiyonon katapi nogi mantad Sarawak om nogi Brunei ih rumikot id pogun diti momoguno korita.
“Monongkotoluod tokou kumaa Luguan Montiri ih pinopoboros do kinookunan montok popoinggayo do talun alun KK-Sindumin…iti noh ih pinoboros do iso mantad ‘janji pinotopot’, ” ka disio.
Pinosunud disio do amu nogi minog rayat do ompuong om tumongob nokomoi ‘komitmen’ padaamaan Umno om nogi BN.
Ka disio, Umno om BN okon ko gugumaga ih ogumu paparayat ‘janji’ katapi au kamampu om au kaanu popotopot do janji dino.
“Gugumaga ih koilo mamajanji noopo…janji kosong (au oopot) om koilo mimboros ponombirangan noopo,” ka disio.
Sapawi ih nogi Luguan Umno Boogian Sipitang minoboros, Umno nogi okon ‘batu loncatan’ montok sosongulun momogonop iman-imanon.
Ka disio, onu ih pinoboros di Luguan Montiri ih nogi porosiden Umno pinopointarang kokomoi do padaamaan totopot Umno om BN.
Tumanud disio, padamaan Umno om BN nopo nga padamaan ih totopot montok rayat om okon ko montok momogonop do imaan-imanon sosongulun.
“Padamaan totopot iti noh ih popomilo dotokou tumilombus ‘komited’ montok popindaama om mongumolig nasib rayat,” ka disio.