KOTA KINABALU: Kiginumu 7,173 modidikot aiso kasagaan (PTI) nuyung doid pogun natadon diolo poompus timpu Januari gisom Julai sabagi laang montok manalasai korikotan togumu modidikot id pogun Sabah.
Potunud Tinimungan Pakaraja Poimbida Pisompuruan Pogun Sabah, Dato’ Suhaimi Mohd Salleh minoboros kogumuo dino nokomoi kapaamung do kinagakaman ih pinapanau di toinsanan agonsi popogirotkuasa id pogun diti.
“Ino nopo nga ginumu PTI ih minaan uyungo doid pogun natadon diolo maya operasi ih pinapanau di mogisusuai agonsi popogirotkuasa id pogun Sabah,” ka dau.
Namot dino, minoboros ih Suhaimi do kiginumu 1,954 PTI tinahan ‘reman’ do kokuasaan diolo poompus timpu Januari gisom 13 Ogos miampai 21 tangaanak kiumur 6 gisom 15 toun naanu minanampasi.
Pinatarang dau, tumanud babakon’ kiginumu 1,583 tulun Polipin, 364 tulun Indonesia, 5 tulun Pakistan, 1 tulun China om 1 tulun Brunei tinahan ‘reman’ di Tinimungan Pakaraja Poimbida Pisompuruan Pogun gisom baini diti.
Minoboros ih Suhaimi do kogumuan diolo poiyonon id Longkod Panahanan Namot (PTS) id watas Papar pogului pootodon muli doid pogun natadon diolo sompori-pori.
“Ino nopo nga asil mantad operasi-operasi ih pinapanau id pogun Sabah montok manalasai do korikotan togumu PTI.
“Iti amu osondikot kopokito do porinta tumilombus ‘komited’ om orulud montok papanau do mogisusuai ababayan montok mongipop korikotan do modidikot hiti,” ka dau.
Pinatarang di Suhaimi do pinopoobi oh kokuasaan dau do kiikira RM4.2 riong sontoun mongipop kobolingkangan PTI id pogun Sabah om gisom wulan Ogos diti, kiginumu RM4.2 riong nakabalanja montok tujuan dino.
Kawagu dau, balanja ih komoyon dino kapaamung do kapanaakan taakanon ontok operasi, taakanon tanahanan id PTS, kotorinaan padsakaian om ‘operasi bersepadu’.
“Iti amu kotilombus kopokito do kotopotan koporintaan Pisompuruan montok papawakas do karaja mongipop PTI suai ko ponuridongan Tinan Monorina Ponoriukan Doung Raja (RCI) ih pinosunud di Luguan Montiri ontok toun diti,” ka dau.
Tumanud dau, kopolombusan operasi dino nogi kapaamung do mogisusuai karaja montok kapanahak do asil kaampai noh Operasi Tanduk ih papanaon mantad timpu doid iso timpu montok manalasai do kobolingkangan ngawi PTI id Sabah.
Montok id longkod pogun, pialatan koiyonon onuan pongintangan montok Ops Tanduk nga id boogian Sunsuran, Segama, sorili Jalan Gaya om Pasar Tagayo Kota Kinabalu ih kopohompit nogi do piipiro agonsi popogirotkuasa suai.