Mogigiyon mokiwonsoi sunsuyon dumapit Bawang Mangkawago

0

LOBI 3,000 mogigiyon kapaamung do turu kampung id Mukim Penangah, Tongod mokianu porinta momonsoi sunsuyon dumapit Bawang Mangkawago montok popiromut do kampung diolo miampai koiyonon suai.

Iti sabap kampung nokoompit, pialatan dino Kampung Masaum, Kampung Alitang, Kampung Mangkawago om Kampung Suguon ih haro mantad podi timpu sangod pomogunan koduwo sansagan poposiliu bawang kilinaab 20 meter sabaagi ralan tagayo mantad podi 50 toun nakatalib.

Aiso kounalan dino nogi koponusa do kiginumu 86 susumikul pintangaan do mongoi sikul gisom haro ih sansagan amu mongoi sikul sabap amu kosoborong bawang dino ontok modliud.

Ketua Kampung Masaum, KK Arif Saraon, 52, minoboros do nakapaganu noh laang tosonong miampai momonsoi sunsuyon tayid (jambatan gantung) montok papasanang do mogigiyon om susumikul ngawi katapi nakatahan do piipiro wulan noopo pogului rinululun do liud.

“Suai ko susumikul, kooyuon dino nogi kobolingkang do mogigiyon sabap mositi misosoguli momirangkat asil tanom toiko nung haro ahal kaagaban. Haro noh nantakan tondu monontian sansagan maganak id disan bawang sabap amu kaanu sumoborong bawang gisom natadon do tanak idsuang paganakan minidu pogun.

“Aiso pilihai dagai suai ko sansagan sumondiu miampai ralan bawang. Asasaru noh pinoporuput do ahal diti kumaa boogian kitonggungan katapi aiso poh laang naanu.

“Toririmo dagai lumansan haro kobilangan montok mintong kampung dagai haro kounalan miagal tampat suai,” ka disio kumaa do kapaabaran kinoiyonon okon Surat Kabar diti, di kawawagu.

Mukim Penangah poinsumpak id boogian Lamin Koundangan Pogun (DUN) Kuamut, kiikira 200 kilometer (km) mantad kakadaian Sandakan miampai wookon mogigiyon tinimungan kipandapatan tokuudi lumansan doid asil tanom, kaampai noh piasau mamau, gata suai ko tanom gunoon sondiri montok koposion.

Ponorikohon Tinan Koburuon om Koumoligan Kampung (JKKK) Kampung Masaum, Ekong Lumari, 47, minoboros, aiso sunsuyon nogi kopononsog do mongingia id Sikul Kabansaan (SK) Masaum om mogigiyon monginodop id disan bawang montok magandad waig kumodo.

“Nung agayo liud, susumikul mositi mamanau kakod solinaid apat jam montok rumikot id sikulan miampai kosoduo 10 km manta kampung kalapas korita amu kaanu sumoborong bawang. Kobolingkangan diti nogi kontodonon do asaru aantakan amu kosikul oh tangaanak ngawi sikul,” ka disio.

Puru Lamin Koundangan Pogun (ADUN) Kuamut, Masiung Banah minoboros, iso komponi nakaakun montok monoluod 50 paratus kousinan sabaagi tonggungan sosial montok tujuan momonsoi sunsuyon dumapit do Bawang Mangkawago ih piaga-aga koponolon balanja kiginumu RM1 riong.

Idsuang ahal dino, ka dau nosiliu tonggungan koporintaan pogun montok poposodia do poruntukan solobi dino montok tujuan dino montok papasanaang do mogigiyon mokitorina om mokiubat.