KOGIROTAN piromutan koporintaan pogun om Longkod ih nokokogos solinaid diti popomilo do ogumu kousinan Koporintaan Pisompuruan pinoobi montok papanau do kopotundaan om popoingkawas do rontob sosio ekonomi rayat id Sabah.
Berbilion poruntukan pobohogion do tikid toun montok mongobi mogisusuai projek ih napalan id pogun diti, doulu noh idsuang ahal ‘infrastruktur’ om sosio ekonomi.
Maya Palan Malaysia Koopod (RMK-10) noopo, Sabah nokotorimo pamahagian poruntukan koduwo popoingkawas montok Ponurugan Koiso toun nakatalib gisom toun diti miampai gatang RM10,723 bilion ih gunoon montok papanau do 424 projek kawawagu om manalasai do 761 projek oputan.
Montok Ponurugan Koduwo RMK-10 tumimpuun toun diti gisom toun tabantalan nopo nga, kiginumu RM4.4 bilion pataakon kumaa Sabah montok papanau do 724 projek.
Boyoon Montiri, Datuk Seri Musa Aman minoboros gisom 3 Mei nakatalib, kiginumu RM692 riong toiko 15.68 paratus mantad poruntukan toun diti nakabalanja noh om ino mongobi do kiikira 0.17 paratus mantad purata 15.85 paratus poruntukan ih nakabalanja noh id bogian kabansaan.
“Poruntukan potilombus mantad Koporintaan Pisompuruan ponokotanda do ‘komitmen’ Longkod ih toririmo maganu kawagatan karaja popotunda do pogun diti.
“Sabah kinasib kiharo piromutan di tosonong miampai Koporintaan Pisompuruan sabap ino kotilombus kaanu papasanang dotokou monorimo ogumu poruntukan tikid toun,” ka disio.
Ontok timpu ios’i, nopili nogi Sabah sabaagi pialatan pogun koponorimo kousinan asanang momoguno poingkakawas mantad Boogian Misokodung Tulun Ginumuan Misosondiri (UKAS) ih posodiaon montok monulung komponi misosondiri id pogun dino papanau do mogisusuai projek kiasil kopio.
Gisom baino, kiikira RM500 riong pinabahagi Koporintaan Longkod maya laang dino ih kopohompit do kapaapuan misosondiri kiginumu kiikira RM5 bilion.
Pialatan projek kopoorimo kousinan dino nga Tawau Green Energy id Tawau, Sipadan Mangrove Resort (Semporna), Longkod Koonvensyen om Teknologi Sompomogunan (ITCC) Penampang, Longkod Konvensyen Sompomogunan Sabah (SICC) om Longkod Pongubatan Gleneagles id Kota Kinabalu om Resort Ponombuluian Bersepadu Teluk Dalit id Tuaran.
Ino nopo nga pialatan Projek Ponimpuunan (EPP) om Koridor Kotundaan Sabah (SDC) ih noilaan kaanu popoingkawas do ekonomi Sabah ontok timpu tabantalan.
Musa ih nogi Montiri Kousinan pogun, minoboros kapanahakan kousinan dino nopo nga ponokotanda ‘keprohatinan’ Koporintaan Longkod kumaa kogunoon pomorunan misosondiri id pogun diti sabaagi laang montok monulung papagaan do balanja projek diolo.
“Tokou mamagatang kopio toluod Koporintaan Pisompuruan maya kopomuruanan Luguan Montiri, Datuk Seri Najib Tun Razak ih toririmo maganu kawagatan kogunoon pogun diti,” ka dau.
Di kawawagu, mongindapu Bumiputera id Sabah nogi nokotorimo pamahagian kousinan asanang momoguno ‘Unit Peneraju Agenda Bumiputera (TERAJU) kiginumu RM100 riong montok pongobi do ‘inisiatif’ kotundaan maya SDC.
Katanud kogunoon winakas ih saamkin mingkawas sumusuut kinatambaan momoguno om kaparagatan pomorunan, minaahagi nogi oh koporintaan longkod do kiginumu RM321.9 riong montok popoingkawas kapanaakan lotirik posodia haro maya RMKe-10.
Onu ih pinoboros nga wookon nopo mantad poruntukan pinatahak Sabah sabap ogumu kagu kousinan poruntukan Koporintaan Pisompuruan kitujuan popoingkawas do kotundaan om popoingkawas do rontob sosio ekonomi rayat tuh katanud miampai kinodimpatan id pogun suai.