Home - Utusan Borneo - Berita Iban - Parlimen tau diketu tajapan benung beaum
Parlimen tau diketu tajapan benung beaum
Posted on August 18, 2012, Saturday
KUCHING: Tanya lalai, sekalika parlimen tau diketu tajapan parlimen benung beaum entara 24 September nyentuk ke 27 November 2012?
Sapit Speaker Dewan Rakyat Datuk Wan Junaidi Tuangku Jaafar madah enti parlimen diketu dalam timpuh parlimen beaum, pekara nya enda ulih diseliah tajapan Kaban Parlimen (MP) udah nerima notis ti minta sida iya datai beaum Dewan Rakyat.
“Tajapia, nadai nyadika penanggul sekalika nya notis udah disadung tauka Dewan udah ngepun aum. Menteri Besai (PM) ulih bejaku ngagai Yang Dipertuan Agong minta parlimen diketu. PM ngembuan kuasa ke enda ulih ditagang netapka pemutus ke bansa nya.
“YDP Agong mega ngembuan kuasa kediri empu ninga sereta nyukung pinta PM. Reti nya parlimen ulih diketu barang maya enda ngira sekalika nya parlimen benung beaum tauka enda,”ku iya lebuh dikerandau kemari.
Wan Junaidi ke mega MP Santubong meri penerang alai enti parlimen diketu, lalu enti amat nyadi, pekara nya enda ngubah atur adat ke benung dipejurai dalam parlimen.
Entara pekara ke deka dipejurai dalam parlimen iya nya Bajet 2013 ke disadang deka diterangka PM Datuk Seri Najib Tun Razak kenaka 28 Sept 2012.
“Enti bajet diterangka kena 28 September lalu PM minta Yang Di Pertuan Agong PM ngembuan kuasa ke enda ulih ditagang netapka pemutus ke bansa nya. Datuk Wan Junaidi Tuangku Jaafar Sapit Speaker Dewan Rakyat”
“ngetuka parlimen, enggau pemutus nya parlimen patut diketu ketegal raban MP ke dipilih enda ngembuan kuasa agi nyentuk ke sida iya dipilih rayat baru.
“Tang, ba senentang atur adat, enda ngira ba tikas ni udah dipejuraika ba parlimen, mengkang dikena sereta dipebasa.
“Enti parti ke sebaka udah dipilih baru numbuhka perintah reti nya raban MP tau berengkah bejalaika pengawa ba tikas sida iya diketu dulu agi ari nya,”ku Wan Junaidi.
Berita angin bisi didinga alai PM dipelaba deka ngetuka parlimen sepengudah iya nerangka bajet 2013 tajapan iya mega ngembuan kuasa ngetuka parlimen ba taun ke deka datai iya nya maya renggat parlimen tembu ba bulan March 2012.
Enti iya netapka pemutus ngetuka parlimen maya aum, tu ukai keterubah pekara tu nyadi.
Ba 1999, Menteri Besai ke dulu suba Tun Dr Mahathir Mohamad netapka parlimen diketu kenaka 11 Nov iya nya maya bajet benung dipejurai alai iya dulu agi ari nya udah nerangka bajet nya kenaka 15 Oktober.
Ba kaul bukai, MP Bandar Kuching Chong Chieng Jen madak ke diri udah nerima notis aum Dewan Rakyat lalu deka ngenataika diri enggau beaum.
Lebuh nanyaka penemu ari iya, Sekretari DAP Sarawak nya madah parlimen enda diketu dalam taun tu alai Barisan
Nasional deka nembuka renggat parlimen ke disadang abis ba tengan bulan April 2012.
<< Previous Entry - Next Entry >>
