Home - Utusan Borneo - Berita Iban - Rayat dipinta semampai nyaga pengelikun menua
Rayat dipinta semampai nyaga pengelikun menua
Posted on August 19, 2012, Sunday
SRI AMAN: Menteri Muda Pemansang Menua Pesisir enggau Pengawa Berumah, Datuk Francis Harden Hollis ngelalau rayat di menua tu patut berasai lantang ati enggau pengelikun ti udah diasaika kenyau ari 50 taun ke udah.
Ku iya, pekara tu beguna amat ngambika kitai enda irau ati ba pengidup sereta seruran ngasaika pengelikun.
Ku Harden baru, bisi rayat di menua bukai ti enda ulih ngasaika pengelikun baka ba Malaysia ketegal penyarut enggau laya bepun ari pengawa begedika bansa enggau jalai pengarap bansa bukai.
“Nya alai, aku minta rayat ditu belajar ari penusah ke nuntung menua bukai sereta seruran nyaga pengelikun ba menua kitai tu belama,” ku iya.
Harden ke mega Kaban Kunsil Nengeri (ADUN) Simanggang bejaku munyi nya lebuh ti bejadika Pengerami Makai Lemai beserimbai enggau pengawa ngintu Ke-16 taun udah numbuhka Biro Indu Saint Margaret Chapel Bayai ditu, malam ensanus.
Berebak enggau pengerami nya, Harden nyuaka chek Projek Mit Pemansang Menua Pesisir (MRP) RM10,000 ngagai Saint Margaret Chapel enggau Biro Indu Gereja RM5,000.
Kelimpah ari nya, Harden mega madahka pengawa bebatak asur ba pupu raban bansa enggau jalai pengarap nyaup ngemujurka polisi politik pemansang ti dipejalaika ba menua tu.
“Tu meh kelai pemanah enggau pengering perintah Barisan Nasional (BN) nempa penyerakup ba pupu raban bansa di menua Malaysia” ku iya.
<< Previous Entry - Next Entry >>
Advertisement
