KUCHING: Opis Kunsil Majlis Perbandaran Padawan nengah opis sekretari opis kunsil nya, deka ngaga pelin besai pengawa dagang temuai ke deka meri penguntung ngagai sitak Padawan, Bau, Lundu enggau Serian.
Chairman MPP Lo Khere Chiang madahka perambu ngaga pelin besai dagang temuai nya suba sigi entara perambu besai ke diperansang ulih Kepala Menteri ngagai MPP.
Ku Lo, projek ngaga nya dipegai ulih opis sekretari MPP lalu deka bekerejasama enggau Fakulti Dagang Temuai, UiTM Sarawak.
“Entara perambu projek, iya nya deka ngaga pakej mungkur industri dagang temuai di Bau, Lundu, Padawan enggau Serian lalu deka nyual pakej tu ngagai temuai di menua luar,” ku iya madah ba aum media di Opis Kunsil MPP ditu, kemari.
Iya nambah, dalam atur baka tu, mensia mayuh ke diau di sitak tu deka bulih penguntung ke sama rata kelimpah ari temuai pen bepuas ati enggau utai ke dipeda sida iya.
“Orang nya berat endar…Kitai bisi runding ke manah. Enti komuniti enda mantu kitai, kitai enda ulih mujur tang komuniti mega patut ulih meri servis ke manah ngagai temuai,” ku iya.
Pelin besai nya ke digaga belabuh ari ujung bulan Februari, dipelaba deka tembu tengan bulan taun baru nyin ila, lalu pan kena ngaga (masterplan) nya deka diungkup ulih Perintah Menua.
Sebedau nya, Lo madahka industri dagang temuai di menua tu bedau manggai tikas ke profesyenal.
Iya madah baka tu lebuh betapi enggau penanggul ke ditunga iya empu lebuh mai orang intelek ari menua luar nemuai ngagai sitak Annah Rais bedau lama tu tadi.
“Ijin temuai enggau malin temuai bedau ulih meri utai kedeka temuai kitai,” ku iya.
Ku Lo, orang intelek madahka kala ninga orang becherita pasal pengeraja pemanah sungai kitai menua tu nyengkaum Sg Rajang, enggau pemanah rampa menua.
“Sida iya nanya aku endur rampa menua kitai. Ku aku, di Borneo Highlands (Resort (BHR) ke manah endar ulih meda rampa menua tang disaut (tourist guide) nya kelalu mar mai temuai ngagai BHR. Laban enti kin ku iya, ungkus manggai RM2,000 ke dua hari/semalam. Tang kebendar semina urung RM350 aja,” ku Lo ke enda lantang ati ninga malintemuai ke madah utai ke enda amat.
Iya nambah, temuai ke diulu iya pen enda nemu kita ngembuan sungai ke ulih bekayuh kayak, telaga angat (hotspring) enggau sekeda palan bukai, laban ku malin temuai nya seruran madahka enda chukup jam.
“Temuai nya baru pulai pagi tadi (pagi kemari, datai hari Lima tu tadi, enda patut enda chuku jam,” ku iya ke madahka malin temuai enda nemu ‘nyual’ pemanah produk ke bisi di menua tu.
Iya nambah baru, lebuh temuai deka bebelika barang di sebuah kedai nyual barang rias, antic enggau kraf jari di Annah Rais, iya madahka malin temuai nya enda ngasuh temuai meli ba kedai nya laban ku jaku, rega kelalu mar tang ngasuh temuai meli di pasar ke nyual lebih murah, ku iya.
“Tu ke enda ngelantangka ati aku, lalu tu mega entara pekara ke patut dikemutarka. Kitai bedau entu nemu ‘nyual’ produk kitai,” ku iya.