KAPIT: Kaban Parlimen (MP) Kapit, Datuk Alexander Nanta Linggi mesan raban Komiti Pemansang enggau Pengelikun Genturung Pendiau (JKKK) pemesai guna besimpanka rikut Profil Genturung Pendiau.
“Profil Genturung Pendiau beguna ungkup genap buah rumah panjai besimpanka penerang enggau data ke beguna. Tuai Rumah aruh nemu semua penerang bekaul enggau rumah panjai ke dipinta ijinsi perintah.
“Nya kebuah woksyop tu beguna bendar. Lepas tu JKKK diadang ngembuan atur ke engkeman agi tauka semua JKKK enda tau enda nyimpan semua rikut sereta penerang bekaul rumah panjai kita,” ku Nanta.
Iya bejaku munyi tu ba atur pengawa ‘Bengkel Kecemerlangan Kepimpinan Dan Pengurusan JKKK’ ungkup rumah panjai tauka JKKK di Zon Ili Rajang sitak ADUN Pelagus ke diatur ba Rumah Pasang, Nanga Ensilai empai lama ke udah.
Woksyop dua hari nya diatur Opis Pelilih Mit Kapit enggau Opis Pemansang Raban Bansa (KEMAS) bepatronka MP Kapit empu, Datuk Alexander Nanta Linggi.
Iya temegah bendar ati meda woksyop nya mujur bendar diatur taja pan nguna belanja ke besai seraya muji komiti pengatur ke pemanah pengawa ke udah dikereja sida .
Sepengudah atur pengawa nya Alexander nyua setipikt ngagai semua sida ke diterima ketuai raban, Tuai Rumah Madang Anak Jelani.
Ba pengawa nya mega, Alexander bisi nebah geran RM10,000 ngagai JKKK Rumah Pasang.
Bela bisi datai ba pengerami penutup sekretari politik Kepala Menteri, Wilson Nyabong Ijang enggau Tengku Geruna, D.O. Kapit Elvis Didit, Mandal Walikota of Opis Kunsil Kapit, Kunsilor Jefferson Jamit Unyat, Supervisor kanan KEMAS Kapit, Ambrose Abong Bugek, ketuai woksyop, Tuai Rumah Madang Jelani, sekeda ketuai ijinsi perintah enggau bala speaker woksyop.
Mega bisi nyempulang Pemancha David Dian, Pengulu Nalong Daga, Pengulu Enggin Nyipa, Pengulu Esit Nalo enggau Pengulu Salang.
Pusin kedua woksyop nya ila deka diatur ba Zon Ulu Rajang di baruh pegai Pengulu Esit Nalo enggau Pengulu Geruna ba Rumah Yan di Nanga Merit kena 4 – 5 September tu ila.
Udah nya ila pusin ketiga enggau ke penudi woksyop nya deka diatur ba Zon Tengan Rajang di baruh pegai Pengulu Uga Esop enggau Pengulu Enggin Nyipa kena 11-12 September ba Rumah Bujah Anak Ijau di Nanga Pelagus.