Site Last Updated 4:58 pm, Friday

Perintah ngemeratka tanggungpengawa NGO

by Rengenyan Labang. Posted on August 31, 2012, Friday

KUCHING: Berindik ari penyiru sereta penyakah ti dikemeranka Gerempung Ukai Dikuasa Perintah (NGO) ngereja pengawa rama besaupka raban orang ke kurang bidik lansik, perintah nganggap tang­gungpengawa sida balat dikemerat dalam komu­niti.

Menteri Pengintu Penge­lantang, Orang Indu enggau Pemansang Ruang Bilik, Datuk Fatimah Abdullah ma­dah, NGO di nengeri tu amat bebendar mantu perintah ngelempungka penusah raban orang ke begunaka bantu.

“Sarawak diuan rayat ti beratka pengelantang orang bukai. Sida (NGO) ngembuan pengibuh sereta gerah jari mantu orang ke seranta tauka sida ke kurang bidik lansik,” ku iya.

Fatimah mansutka penemu nya ba aum pengarang ber­ita bekaul enggau program “Sarawak Volunteers Walk of Love – We Care We Share” ti diatur opis menteri iya ba Wisma Bapa Malaysia ditu, ngalih hari ensana.

Ngenang program nya iya madah, program bekon­sepka karnival ti mungkur orang mayuh sereta NGO tauka gerempung ti deka ngemansangka gerempung sida.

Progam nya mega nunjukka NGO ulih ngiga belanja diri sereta ukai semina bepanggai ba perintah aja, ku iya.

“Tuju program tu diatur kena ngumpul pemeri kena mantu NGO melanja pro­gram enggau aktiviti ti udah diperambu sida sereta kena meri kelai penumbuh NGO ngambika raban bansa chakah mekuh pengawa gerempung (NGO).

“Semua asil pemeri ti digumpul sereta asil barang ti dijual deka diberi ngagai NGO magang, Opis Menteri Peng­intu Pengelantang, Orang Indu enggau Pemansang Ruang Bilik semina nyadi pengatur program nya,” ku iya.

Nitihka penerang Fatimah, program nya deka diatur kena 6 Oktober 2012 ba ten­gah laman Dewan Suarah, Kuching.

Program nya dipelaba deka dipenyadi Kepala Menteri Pehin Sri Abdul Taib Mah­mud.

Raban NGO ti deka masuk program tu tau berengkah ngerejister seharitu (kemari) nyentuk ke 15 September 2012 ba opis menteri.

“Kena ke 6 Oktober Kepala Menteri deka diasuh be­jadika logo sereta nyuaka kad ngumpul pemeri ngagai pen­gari NGO. Pengawa ngumpul pemeri dipejalaika tiga bulan berengkah ari program nya dipenyadi (6 Oktober).

“Naka ke seharitu (kemari) bisi 30 bengkah NGO udah ngerejister masuk program tu, kitai ngarapka pemayuh nya deka majak nambah.

“Kitai mega ngelaluka sida gerempung korporat sama ngulurka bantu baka per­engka, ngemanahka rumah sereta bantu bukai kelimpah ari mata duit,” ku iya.

Bejaku baru iya madah, kena nukuka orang mayuh ari sebarang penanggul lebuh deka meri pemeri, kad pemeri nya deka bisi logo, lumur siri sereta dijaga pemesai ti udah dipaduka aja.

Entara aktiviti ti diatur nyerumba program nya, be­jalai kaki bebala mayuh, pen­gawa pemandang, seruyuk endur bejual, panggau pemer­indang, sukaneka ruang bilik sereta ngelantangka ati begu­lai enggau diri sebilik.

Bela datai ba aum pen­garang berita nya, Menteri Muda Pengintu Pengelan­tang Robert Lawson Chuat, Menteri Muda Pemansang Ruang Bilik enggau Pelajar Anak Mit Rosey Yunus sereta bala bukai.

Print Friendly

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Comments are closed.