PENGINGAT: Gambar fail niang Jawi, nerima gelar PBS ari TYT.
MIRI: Tuai raban bansa Iban ti keterubah di Pelilih Miri, Temenggong Jawi Baki, udah nadai kena 2 September.
Iya ngapuska seput pukul 1.45 pagi ba Taman Batu Niah lalu bangkai iya deka dibai pulai ngagai rumah panjai iya di Sungai Lamaus, Niah ngambika dirabat.
Iya ninggalka seiku anak tunggal indu – Inchah Jawi ke ngibun bilik sida di rumah panjai, tiga iku uchu (dua indu enggau seiku lelaki) empat iku ichit.
Niang Baki tu keterubah ketuai raban bansa Iban di pelilih tu ngena gelar ‘Temenggong’, pangkat ke dipenggi iya ari 9 September, 2000 nyentuk ke 2004.
Dulu sebedau nya iya dichiri mangku pengawa ‘Penghulu’ kena 1 Mei, 1969.
Udah nya iya niki ngagai ‘Pemancha’ kena 5 April, 1993 sebedau iya ngena pangkat ‘Temenggong’.
Setegal pemanah pengawa iya ngagai mensia mayuh iya diberi pangkat ‘AMN’ (Ahli Mangku Negara) ari Yang Di Pertuan Agung kena 7 Jun, 1997.
Iya bulih pangkat ‘PBS’ (Pegawai Bintang Sarawak) kena 5 Julai 2001 – ke diberi Tuai Pemegai Menua Sarawak.
Sekeda orang ke meri basa ke pengambis ngagai iya nya Sekretari Politik Kepala Menteri, uchu iya empu Victor Temenggong Angang.
Bangkai Jawi deka ditumbak di Golden Hill Memorial Park, Lambir, pagila (5 Sept) pukul 8 pagi.