Abit muji sukung peranak Baleh enggau Belaga

Posted on September 6, 2012, Thursday

Iya mega temegahka kaul ke tegap entara sida lebih agi ba raban bansa Dayak: Abit

KAPIT: Kaban Parlimen (MP) Hulu Rajang Datuk Billy Abit Joo temegah bendar ke sukung semua peranak Baleh enggau Belaga.

Nyerumba pengerami Hari Merdeka, iya muji kaul mensia mayuh lebih agi bansa Dayak berindik ari basa sereta pengelala peranak menua tu ba penusah sereta pemerani raban bansa kitai ke udah berambunka nyawa nyaga pengelikun.

Iya bejaku munyi nya maya ‘Ketuai Begulai enggau Rayat’ ba Rh Tajai Sanggau, Ng Sebiro, Btg Baleh ke diatur opis JASA Kapit.

“Munyi ku disebut aku ba Rh Kanyan, Nanga Sepasir dua hari ke udah, pengawa aku ke bejalai ngabas peranak menua ke dipegai aku ketegal bejalaika pengawa pengari rayat.

“Pengawa aku ke bejengukka rayat di pelilih tu laban beratika pemujur pejalai projek sereta bantu dikenatai ngagai pengundi aku ditu,” ku iya.

Iya madah nengah program ‘touch point’ ke dipejalaika perintah besai, Menteri Besai Najib Rajak ngarapka semua penanggul rayat ditapi enggau siru,” tandu iya.

“Aku ngelunjak baru, ari menya maya Parti Bansa Dayak Sarawak (PBDS) nyentuk ke diatu ba Parti Rayat Sarawak (PRS), penegap sereta pengangkun aku ba parti endang enda begilik,” ku Abit.

Ngenang pasal penegap parti, Abit madahka diri seruran gawa bebendar mantu ngenegapka parti lebih agi gempung Barisan Nasional (BN).

“Aku mega ngarap, semua parti dalam gempung BN deka besaup ngambika pengudah pengawa bepilih tu ila perintah Barisan Nasional meruan ngiring menua sereta rayat.

Berebak enggau nya, iya nesau mensia mayuh ngambika seruran tegap nyukung pengari BN ba Hulu Rajang maya pengawa bepilih tu ila.

Iya mega ngelalau mensia mayuh awakka enda muntang tekuing penemu ninga achuk raban penyakal.

“Indah sekeda nengeri baka Pulau Pinang enggau Kelantan enda ulih intu sida anang kenu ulih merintah menua baka perintah BN,” tandu iya.

Lebuh ngenang panjai agi, iya madah, Pakatan Rayat (PR) nadai peneleba megai menua. Ari nya rayat aruh ngelala pengelemi PR sereta nemu penegap enggau pengering BN.

Nyerumba nya, iya mega nyuaka bantu RM17,500 dikena peranak RH Tajai nyeruri sereta ngemanah rumah panjai sida.

Iya mega menggi RM5,000 ngagai SIDS pampang Ng Sebiro ngambika bisi dikena ngatur program betenun Pua Kumbu.

Lebuh bejaku, Tuai RumahTajai berasai gaga digulu penemuai Abit enggau raban iya ngagai rumah panjai sida.

“Peranak rumah panjai dia udah mandangka penegap kaul enda ngira pegai politik tang ngemerat pemujur ke tau nguntung ke semua. Kitai mega besemaya deka nulung barang sapa dipilih MB ngarika Hulu Rajang maya pengawa bepilih tu ila,” ku iya.

Seiku da agi Tuai Rumah Nabau Tutong bela nyukung penemu Tajai sereta ngarapka semua peranak menua dia nyukung Abit.
“Munyi ke suah disebut ngelama tu, kami ngarapka BN mendingka peneka rayat ke dipegai Abit. Kami ari Hulu Rajang ngarapka Abit agi dipilih nyadi pengari rayat maya pengawa bepilih besai tu ila,” ku TR Nabau.

Bela bisi mantaika penemu, Pemancha Tony Kulleh ke ngarika peranak Belaga madah, rayat dia agi ngarapka Abit agi dipilih nyadi pengari BN maya PRU13 tu ila..

“Pengelandik sereta peneleba ke dikembuan iya jauh nyamai ngemuntang pengawa iya mantu rayat lebih agi ba sitak Baleh enggau Belaga,” ku Kulleh.

“Aku arap bendar, berindik ari penyakah Abit, mayuh pemansang lebih agi ba pengawa betanam betupi, perengkaguna sereta pemansang rayat deka disepi ba sitak tu bepun ari penegap kaul iya enggau perintah nengeri sereta renggat tinggi,” ku iya.

Ku iya, taja PRS udah nganjung nama pengari Hulu Rajang ngagai ketuai BN renggat atas tang kami arap bendar Abit ulih dipilih ngarika sitak nya maya pengawa bepilih besai tu ila.

Kelimpah ari nya, Ketuai Opis Pemadah Kapit Koh Kumbong enggau Penghulu Jampi Raweng lebuh bejaku, ngarap Abit meruan dipilih ngarika sitak nya.

Ba pengawa ke digulu urung 18 Tuai Rumah, pemesai perintah, ketuai raban bansa bukai, sekeda ari beratus iku mensia ke datai.

<< Previous Entry - Next Entry >>

Comments are closed.