Pengelandik Iban nyelai ari bansa bukai

0

PENYELAI IBAN: (Ari kiba) Langgu, Daresah enggau Sanib jenuh mendingka penerang ari raban pemansik ba program sehari nya.

Mayuh amat sejarah bansa Iban ditusui nengah pengingat ukai ari tulis, ku Langgu
KUCHING: Pengangkun Arkib Negara ngerikut sejarah Iban kelia bepelasarka pengingat enda betulis patut dipuji, ku pemansik sejarah Iban Datu Sri Edmund Langgu anak Saga.

“Jalai Iban ngingatka utai diasai aku chukup unik iya nya nyelai ari bansa bukai. Iban kelalu mayuh bungkur dalam adat enggau main asal lalu Iban tan bemain ari lemai nyentuk ke pagi baka pengawa mengap tauka renung.

“Iban bekenaka pengingat enda betulis ngingatka semua pekara lebih agi sejarah ti udah nyadi. Pengingat enda betulis tau nambah sejarah bukai ke udah ditulis orang ke dulu nyengkaum ke ditulis Melayu sereta orang putih,” ku iya.

Kitai nangika semua sejarah lama ti dikembuan orang tuai ti agi idup enda dirikut manah, tandu iya.

Iya mansutka jaku tu lebuh diundang bejaku dalam program Polemik ‘Petempatan Di Sarawak Dari Tahun 1400 hingga 1840 Masehi ’ Sejarah Malaysia sesi ke 27 ti diatur di Palan Penerang Islam (IIC) Jalai Ong Tiang Swee ditu, ensanus.

Ku Langgu, ‘library’ kitai iya nya orang tuai Iban ke agi idup ti ngembuan macham pengingat sejarah ke enda ditulis alai pengingat tu patut dirikut ngambika enda lenyau sengapa.

“Librari kitai dikembuan orang tuai Iban ti agi idup baka aku tu. Aku enda nemu ni pengelama agi idup lalu semua pengingat sejarah tu deka lenyau ditaban pemati kami.

“Berindik ari nya, pengingat enda betulis ke nyengkaum ‘oral tradition’ patut dirikut raban pemansik kitai menua tu,” ku iya.

Langgu ke beumur 76 taun diatu mega madah ‘tusut’ entara sebengkah chara Iban ngingatka utai taja pan chara nya enda dikearap raban orang nulis menua tasik.

Ku iya, tusut dalam Iban ditusun enggau naka pemanah sereta pengamat ketegal tusut nya deka didinga semua orang serata menua ngambika enda dikumbai bebula sengapa.

Langgu ke ransing bejalaika pansik senentang sejarah Iban lebih agi ba senentang penatai bansa tu ari Kapuas tama ke Sarawak mega madahka cherita Beji ti ngaga tangga ba atas pun Entepung dikena niki ke langit ketegal ke deka betemu enggau petara sigi amat nyadi alai iya mega madahka udah tetemuka palan endur pun kayu Entepung nya diatu.

Dulu agi ari nya, Direktor Arkib Negara Malaysia Daresah Ismail ba jaku pengelalu iya madah tuju program diatur iya nya dikena ngempuru sejarah ti baru ditemu asil pansik raban ke landik dalam pekara sejarah lalu dipejurai jauh agi.

“Program tu meri awak ngagai raban pemansik mantaika sejarah ti baru ditemu lalu dipejurai raban ke landik ngambika tau dipasukka dalam bup sejarah menua.

“Kelimpah ari nya, program tu mega meransang mensia mayuh lebih agi raban pemansik bekenaka penerang ti bisi disimpan dalam arkib negara dalam pengawa pansik,” ku iya.

Ba program nya, Prof. Madya Dr. Neilson Ilan Mersat (UNIMAS) bisi mantaika asil pansik ba senentang ‘Sejarah Awal Migrasi bansa Iban di Sarawak’ alai iya nyeritaka pejalai bansa Iban ari Kapuas, Indonesia tama ke Sarawak nengah menua Kumpang sebedau jeman perintah Rajah Brooke.

Ku Neilson, asil pansik tu diulih ari tulis ke dulu ti gaga raban pemansik menua tu sereta pemansik ari menua luar kelimpah ti ngaitka sejarah nya enggau pengingat lama ti dikembuan orang tuai baka Langgu.

Bela ngenataika asil pansik ba program nya Prof. Madya Dr. Bilcher Bala Universiti Malaysia Sabah (UMS) ‘Fakta Sejarah Sarawak Pada era 1400 – 1840), Bidah Ugung ‘Sejarah Awal Migrasi kaum Bidayuh di Sarawak’ , Chairman sesi DR. Ahi Sarok sereta Prof. Madya Dat Sanib Said.