KUCHING: Bekal ai ti dianjung Opis Pengintu Pengelantang Mensia Mayuh (JKMS) lebuh betapi enggau maya kemarau di sitak Simunjan, ngemeratka genturung pendiau ke semina ngarapka timbun ai ujan.
Menteri Pengintu Pengelantang, Indu enggau Pemansang Diri Sebilik, Datuk Fatimah Abdullah madah pemerat nganjung bekal ai di sitak menua nya, dianjung ngagai sekula, rumah panjai tauka kampung ke nadai paip, masjid, dewan komuniti, enggau sekeda palan ke berat ke begunaka ai.
“Jaku lalau aku ngagai mensia mayuh ke diau di sitak nya, anang kelalu amu enggau ai, bekunsi mega enggau orang mayuh ke sama ngarapka bantu ai ari JKMS enggau Opis Kerejaraya (JKR),” ku iya.
Urung 20 buah kampung enggau rumah panjai di sitak nya mungkur urung 3,000 iku mensia mayuh betapi enggau penanggul nadai ai laban nadai ujan.
Ku Fatimah, JKMS sebedau tu udah dipadah bekait enggau penanggul ai tang mayuh nyadi ba sitak ke semina ngarapka timbun ai ujan nyadi pemisi ai sida iya.
“Sitak ke balat endar dituntung nadai ai, iya nya sitak ke endang nadai paip.
“Kami di JKMS nganjung bekal ai ngagai sitak ke nadai paip digaga JKR tauka nganjung sebarang bantu ke diguna mensia mayuh ke diau di sitak nya. JKR pen sama mantu kami nganjung bekal ai ngagai sitak nya mega kelebih agi ngagai rumah panjai.
“Tang enti JKR enda ulih, kami nganjung bekal ai dalam butul ke ulih nyadi ai irup ke chukup dikena seminggu,” ku iya.
Iya nambah, enti dalam timpuh seminggu agi mengkang nadai ai, JKR patut madah ngagai kami baru ngambika kami ulih nganjung bekal ai baru, ku iya.
Ku Fatimah baru, kemarau kediatu ukai semina nyadi penanggul di Simunjan aja tang ngerampit pasar sitak menua nya ke endang bisi ai paip.
“Ai ke ditimbun ke deka dip roses tauka diberi ubat pen enda chukup. Tu nyadi penanggul ke besai laban di Simunjan diatu nyau kurang ai. JKR pen ngambi ba endur bukai, baka di Sebuyau,” ku iya lalu nambah naka kediatu nadai ripot udah diterima opis nya ketegal ari musin kemarau, bisi penyakit bukai ke nyadi.
Penyampau belanja udah nganjung ai mineral ngagai Simunjan diatu ti dibantu ulih JKMS manggai RM17,000.
Penanggul nadai ai di sitak Simunjan majak balat lebuh tikas ai ke bisi dalam timbun ai di Sungai Lepong semina ngerikod 0.4 meter tauka 1.3 kaki kemari. Enti sema hari nadai ujan dalam kandang 48 jam, lalu nadai bantu bukai, mensia mayuh ke diau di sitak nya deka betapi enggau pengurang ai beresi ke diirup tauka kena nyumai pemakai.