Saup ngemanahka program enggau perambu pemansang perintah: Taib

0

 

SAUP NGEMANSANG MENUA: Taib nyuaka Ijazah Sarjana Muda ngagai seiku graduate Fakulti Sains Komputer Dan Teknologi Maklumat di DeTAR Putra, UNIMAS.

Raban graduate diperansang nyaup ngemansangka menua tu

KOTA SAMARAHAN: Raban graduate diperansang bela ngenataika penemu ngagai perintah ngambika tau nyaup ngemanah program enggau perambu ke diatur.

Kepala Menteri Pehin Sri Abdul Taib Mahmud madah atur kuasa perintah jeman diatu udah tebuka lalu nya diubah engau tuju ngangkat servis ngagai tikas ke tinggi alai graduate ukai semina dipinta nyaup nengah pengelandik ke udah dipelajar tang bela dipinta ngenataika penemu.

“Aku pechaya raban graduate ulih nyaup ngemansangka menua nengah pengelandik ke udah dipelajar. Graduate deka bekenaka penemu sereta penau maya gawa sereta mega diperansang ngenataika penemu diri dalam mayuh bengkah pekara.

“Tu deka meri lalau ngagai perintah sereta nyaup ngangkatka tikas pemanah program enggau perambu projek perintah ngambi teulihka asil ti pemadu manah,” ku iya.

Taib mansutka jaku tu maya bejadi Sidang Tiga Atur Pengawa Konvokesyen ti Ke-16, Universiti Malaysia Sarawak (UNIMAS) ke diatur ba DeTAR Putra, Kota Samarahan ditu, kemari.

Iya ke mega Pro-Chanselor UNIMAS madah, perintah semampai meri awak ngagai raban graduate mansutka penemu diri nengah ‘Akta Universiti enggau Kolej Universiti’ (AUKU).

“Nengah ubah dalam AUKU, pelajar universiti ulih mansutka penemu diri nengah chara ti betul. Ulah ke mudah nunda sekeda pekara enggau enda dipansik dulu sereta pechayaka berita siber nyadi ketegal pemansang ICT ti ngembuan penerang ke enda besekat.

“Orang ke enda nemu mantis semua berita tu deka mudah perchaya lalu tau mai penyarut. Berindik ari nya, graduate patut nemu bagi penerang ke amat sereta ke bebula sengapa ngambika enda tekuing nitihka tuju ti salah,”ku iya.

Ba kaul ke sebaka, Taib muji pengawa UNIMAS dalam Projek Pemansang Kandang Menua Tengan Sarawak alai universiti nya udah mantaika riput penyampau orang gawa ke diguna palan SCORE.

Ku iya, graduate UNIMAS ulih nyaup SCORE ngangkatka ekonomi enggau sosial Sarawak nengah pengelandik ti udah dipelajar.

Ba Konvokesyen ti Ke-16 taun tu, UNIMAS nempa 1,890 iku graduate ke nyengkaum 1,609 penerima Ijazah Sarjana Muda, 178 Ijazah Sarjana, 16 Ijazah Doktor Falsafah enggau seiku nerima Ijazah Kehormat Doktor Falsafah.

UNIMAS meri Ijazah Kehormat Doktor Falsafah (Pansik Pemansang) ngagai Kepala Menteri Pehin Sri Abdul Taib Mahmud ba Sidang 1 ke diatur pagi ensanus.

Bela datai Chairman Kunsil Direktor UNIMAS Datu Dr Hatta Solhi, Mandal Chanselor Profesor Datuk Dr Khairuddin Ab Hamid, Puan Sri Ragad Kurdi Taib, pemesai universiti ke bukai sereta raban apai indai.

PENAPIS PENGAMAT, PEMULA: Entara sekeda raban graduate ke nerima Ijazah sida maya Konvokesyen ti Ke-16 UNIMAS ke diatur di DeTAR Putra kemari.