MIRI: Atur ke udah diambi British American Tobacco Malaysia (BAT Malaysia) mantaika deka nikika rega semua ruku nyampau RM0.20 dipeda sebengkah ari pengawa ke tau ngurangka gian nginsap.
Aktivis Rama Wan Zain Syed Mohdzar madahka atur nya endang disambut manah semua orang lebih agi dikena munaska gian nginsap ke majak nyadi lebih agi raban nembiak.
Wan Zain madahka, nginsap ngeruga pengerai ukai semina sida ke nginsap aja tang orang bukai ke ngelingi sida.
“Sida ke lama udah nginsap, endang disadang niki rega RM0.20 nya deka nating sida tang enti dipikir ngena chara dalam, manah tau ngetu gian nginsap,” ku iya.
Berebak enggau nya, kimpin perintah baka ngengkah gambar penyakit ari nginsap dikerubung ruku nya deka meri empas ke dalam ngagai orang penginsap kelimpah ari rega barang semakau ke ditiki.
Iya ngakun ukai semua orang periman ke gawa aja ulih meli ruku, tang mega nembiak sekula nyengkaum nembiak indu.
Kemari rega ruku baru ke ditetapka BAT Malaysia nya Dunhill (RM10.20), Kent (RM10.20), Peter Stuyvesant (RM8.70), Pall Mall (RM8.70), Pall Mall biasa (RM10.60).
Kelimpah ari nya, rega Benson & Hedges (RM10.20), Lucky Strike Plain (RM10.60) enggau Rothmans International (RM10.60).