Pemujur anak besekula bepanggai ba kaul apai indai enggau pengajar

0

DELIN

BETONG: Sapit Direktor Opis Penyerakup Bansa enggau Integresyen Nasional (JPNIN) Delin Liet Blaun madahka, serakup apai indai enggau pengajar (PIBG) beguna amat kena nentuka pemujur pengidup anak sida jemah ila.

Ku Delin, tebal agi anak ke mujur dalam pelajar sekula laban sida seruran diperansang apai indai enggau bala pengajar.

“Apai indai patut seruran meransang anak sida nyentuk ke sida teulihka pemujur. Enti sida udah mujur ila, apai indai pan berasai lantang ati laban udah mujur bejalaika tanggungpengawa sida,” ku iya.

Iya bejaku munyi nya lebuh ti bejadika Lumba Darat Ninting Taun Tabika Perpaduan Bagi menua Betong ke diatur Opis Penyerakup bansa enggau Integresyen Nasional Bagi Menua Betong begulai enggau Komiti Penyelaras Tabika Perpaduan Bagi Betong ba Kompleks Lumba enggau Main Bagi Betong ditu ensanus.

Delin mega madahka, pemandai ti nyadika pelasar pemujur dalam pengidup patut diulih kenyau ari mit.

“Pengidup anak kita ila deka betapi  enggau pemar enti sida nadai pemandai. Kami arapka anak kita diberi pelajar ke chukup ngambika sida ullih nyaup apai indai nyungkak gaya pengidup dudi ila,” ku iya.

Ku iya baru, apai indai anang enda ibuhka tanggungpengawa meri pelajar ngagai anak sida, laban nya endang pekara ke patut dikereja sida.

“Nadai kebuah apai indai enda ulih ngemujurka anak sida ngulihka pemandai laban diatu mayuh endar bantu dikena nyaup raban orang ti kurang penatai pemisi,” ku iya.

Bela bisi ngulu program nya, Pemesai Opis Penyerakup bansa enggau Integresyen Nasional Bagi Menua Betong, Mohd Dohan Wahid enggau Chairman Pengatur Program, Sabarinah Debot.

Seraban 93 iku nembiak Tabika Perpaduan Bagi Menua Betong ngarika lima buah Tabika sereta sebuah Taska Perpaduan ngambi bagi dalam Lumba Darat Ninting Taun Tabika Perpaduan nya.