KUCHING: Seiku indu ari Batu 15 pechuma dikelakar lebuh tenggak emas ke dipelaba berega RM3,000 ditabanka seiku lelaki Indonesia ke ngasuh iya nyendiaka 30 persin ari RM200,000 laban ke madah deka mantu iya ngambi lebih duit nya ari menang loteri.
Indu ke berumur urung 50 taun nya madah, iya bekelala enggau lelaki Indonesia lebuh nganti bas enda jauh ari palan berubat pakar di Batu Tiga.
Lelaki nya madahka iya bisi kena lumur lalu minta indu nya mantu iya ngambi duit ke ku iya dalam RM200,000 lalu besemaya deka mayar 30 persin ari penyampau nya.
Saspek lalu ngetan sebuah kerita lalu minta bantu nganjung seduai iya ngagai Padungan ke ku jaku, deka ngambi duit nya, lalu deriba enggau seiku indu ke mai kerita nya besetuju nganjung seduai iya tang minta dibayar upah.
Ku indu nya, lebuh sida iya masuk ke dalam kerita, saspek nya nusui ngagai deriba kerita nya loteri ke dimenang iya tadi.
Deriba nya lalu madah upah sida iya nyuaka wang deposit ke dipinta sida iya dalam RM20,000.
Saspek Indonesia nya lalu madah ngagai indu nya pemerat iya begunaka duit ari indu nya lalu besemaya deka mayar pulai baru tang indu nya madahka iya semina bisi RM100 lalu seiku agi indu madahka iya besedia nyuaka RM500.
Tang taja pia, sida bukai dalam kerita nya ngasuh indu nya ngadai tenggak emas iya, lalu besemaya ngambi tenggak emas nya pulai baru, alai indu nya besetuju.
Indu nya mega dipinta ngaga siti salin kad pengelala lebuh sida iya nganti dalam kerita tang lebuh indu nya pansut ari kerita, saspek nya beguai lari ari endur nya.
Maya nya lebuh indu nya sedar diri empu iya diakal, iya minta bantu ari polis peronda ke lalu mai iya ngaga riput ba balai polis Simpang Tiga.
Kes tu diatu benung ditasat.