PALAN ENGKEMAN ENDUR BOLLYWOOD NGAGA FILEM: Abang Johari (enam kanan), Gramong (enam kiba), Talib (lima kiba), Ik Pahon (dua kanan), Benny (kanan) begulai enggau Ramoji (lima kanan) begambar ke pengingat.
KUCHING: Sarawak nempa nama lebuh dipilih industri filem Bollywood, nyadi palan ke dipilih Cinemascope maya ngatur Festival Filem Mumbai ti ke-14 tu tadi.
Enggau gelar nya, ngayanka Sarawak ngembuan pengeraja enggau studio ke nyayanka pemanah rampa menua dipilih endur ngaga filem ke setanding menua Switzerland, Thailand, Korea enggau United Kingdom.
Pemujur tu mega mandangka aum besejarah entara raban ari menua Sarawak betuaika Menteri Dagang Temuai, Datuk Amar Abang Abdul Rahman Zohari Tun Openg enggau orang ke ngempu bandaraya endur ngaga filem ke pengabis besai di dunya Ramoji Rao nyengkaum aum entara Kepala Ketuai Eksekutif Borneo Filmmaking Development Sdn Bhd, ke mega ijinsi ngaga filem keterubah di Sarawak, Benny Zachariah begulai enggau seiku ‘lagenda; industri ngaga filem Bollywood, Mahesh Bhatt ke bisi ati deka ngaga filem ba sekeda palan di menua tu nyengkaum Waterfront Kuching, Taman Negara Bako enggau kandang mengeri Kuching.
Dalam aum entara raban ari Sarawak enggau raban pengatur ari Bandaraya Ngaga Filem Ramoji, Datuk Amar Abang Rahman Zohari madah, opis menteri iya sedia mai raban nya nemuai ngagai menua tu, meda ngena mata diri kereban ke bisi sereta pemanah menua tu.
“Sarawak ngembuan palan ke manah sereta rampa menua ke tau dikena ngantaka gambar dalam filem Bollywood, Tollywood enggau Kollywood,”.
“Tambah mega enggau konsep ngaga filem kena mandangka pemanah rampa menua ke bisi penyama enggau realiti bemusim di India,” ku Abang Johari.
Dalam timbal ari sepiak Ramoji, iya ngarapka Opis Menteri Dagang Temuai ulih ngaga sebuah dokumentari bekait enggau palan ke ulih digaga nyadi ‘destinasi’ ngaga filem.
Lalu kelimpah ari nya mega, ku Ramoji, sida iya pen bisi ati deka nunda ngaga konsep baka di Kampung Budaya (SCV) digaga ba endur sida iya empu, ke bisi pemesai tanah 2,000 ikar.
Ba pekara ke sama nya mega, timbal ari Sapit Menteri Pengawa Dagang Temuai Datuk Gramong Juna madah pemujur berita ari Bollywood nya ngayanka menua tu mujur teulihka sukung ari raban orang ke ngaga filem ke tebilang di India, lalu deka meri penguntung ngagai rayat Sarawak, kelimpah ari pengeluar filem ari menua tu pen ulih belajar ari orang ke landik baka industri filem Bollywood..
“Pemerat diatu, iya nyendiaka perengka guna alai ngaga filem lalu dalam pekara tu, adat pesaka komuniti menua tu deka di angkatka,” ku Gramong.
Ke Kepala Pemesai Eksekutif Opis Lembaga Pengawa Dagang Temuai menua tu, Datuk Rashid Khan, menua tu ke diberi kelala sereta di pilih ulih industri filem India, sejalai enggau pengawa meri kelala menua tu ba pengawa ngaga filem antarabansa ke ulih mega narit temuai ari menua luar nemuai kitu.
Sama bisi ngulu pejalai 5 hari menteri ngagai Bollywood maya nya, nyengkaum Gramong, Menteri Muda Dagang Temuai Datuk Talib Zulpilip, Sekretari Mendam opis menteri, Datu Ik Pahon begulai enggau wakil ari World Communications ti mega nyadi pengatur Asean International Film Awards, Livan Tajang, ijinsi filem Borneo Filmmaking Development Sdn Bhd enggau wakil ari Gerempung Ngaga Filem Dayak Sarawak, Mathew Gasan.