KUCHING: Bisi 166 iku nembiak ke ransing macha ari SMK Pending ngambi bagi dalam kimpin READ 2012 ke diatur Scholastic enggau Opis Menteri Pelajar.
Kimpin seminggu ke berengkah 24 Oktober tu tadi dikena nembiak sekula enggau menua netapka 2,012 sikin tauka 33.5 minit alai sida iya begulai macha.
“Tu keterubah SMK Pending ngambi bagi dalam kimpin nya, 166 iku nembiak ke rindu macha ari sekondari baruh begelumu di Dewan Global, sama bela gagit magang,” ku prinsipal sekula SMK Pending Ivor Emmanuel Lim dalam jaku iya ba atur pengawa nya.
“Macha beguna bendar seraya mantu kitai ngulihka tibang penemu. Ukai semina macha nyungkak pengelandik nulis, iya mega nyungkak penau ba runding kritikal, “ tandu iya.
Lim madah, bala nembiak ke rindu macha deka mujur agi ari sida ke enda.
Kimpin nya berambaika leka jaku “Every Flip of a Page Brings Knowledge” tauka genap lambar ke dikerebak meri penemu, nya tau bendar ngansah pengerindu ke bup.