Iya enda patut diserama, piring enggau sampi ke dikena bansa Iban ngembuan rurun
SIBU: Pengawa tauka adat miring ke suah dikereja kemaya haritu mega bisi dikerandau lebih agi bekaul enggau rebak baru senentang pematut tauka pengenda bansa bukai dipadu miring maya ngatur sesebengkah pengawa tauka gawai.
Ba randau pengarang berita begulai enggau Ketuai Pengarang Pegari Iban Production, Nalong Buda enggau Menijer Besai majalah nya, Johnny Chuat, madah, saut seduai bisi dua pengambi, iya nya tau enggau enda bansa bukai dipadu miring.
Keterubah ku Nalong, bansa bukai tau diasuh miring enti piring nya piring basa, piring pedara lemai tauka keduran lemai ti diintu ketegal rindu tauka senang ati, piring dikena nyambut tauka ngerami Hari Gawai Dayak 1 Jun ninting taun, piring Ngiling Bidai Gawai Dayak, piring dikena bebuti, piring dikena beterima kasih enggau ke bukai.
“Enti enggai enda ngasuh bansa bukai miring, ba penemu aku, piring basa tu mih entara bansa piring ke pemadu patut diasuh dipiringka bansa bukai laban nya kira ke dikena kitai masa tua’, iyang tauka Petara sida iya angka tua’, iyang tauka Petara sida iya bisi datai enggau sida iya ngabang tauka nemuai ngagai menua tauka genturung pendiau kitai Iban,” pia ku iya madah.
Ku iya, dalam jerita tuai, piring basa tu dipungkal Pulang Gana lebuh iya diuji Raja Semerugah beserumpu makai enggau Bujang Inin, anak Tegung Remaung Lubang. Dalam jerita nya, dia kitai nemu Pulang Gana sama mai antu, jelu, Laut, Bunut, China, Belanda, Petara enggau semua utai enseput ke bisi datai makai beserumpu nya sama miring enggau iya dikena iya meri basa ngagai sida nya.
“Limpang mimit ngenang basa dalam daya idup kitai Iban, basa kitai Iban ukai semina diungkupka ngagai diri sebansa aja tang mega nyerarai ngagai bansa bukai ti bisi datai nemuai tauka ngabang ngagai kitai.
“Dalam leka main bansa Iban baka timang (pengap) enggau sampi, ba genteran Ngerintai Tuai, dia kitai ninga sida ke lemambang suah masa Petara tuai bansa Rajang ke benama Sera Bungkuk Ketuk Tunjuk Ujung Jari, tuai bansa Laut ke benama Datu Nuga Tau Mantap Bena Pasang Sepagi, Rajah Brooke Pandai Mujuk Mudi Mengeri, Abang Dundang Ngembuan Tulang Pangkur Besi, tuai Beketan Mantu Hari, tuai Melanau Tipau Daie enggau bala ke bukai ngena piring ngena ading awakka sama datai ngabang datai nandang ngagai sida ti begawai,” ku iya madah enggau nyemetak agi.
Nya alai, ku Johnny, enti miring baka udah disebut nya orang ke nguluka bala nya miring mesti bansa Iban empu lalu Iban tu mesti nemu rengka piring, nemu tusun piring lalu nemu turun piring ke patut, sekalika nya piring satu, piring tiga, piring lima, piring tujuh, piring lapan tauka piring semilan.
“Biau piring ke bansa tu enda tentu panjai, suah tak semina naka minta pengelikun tauka meri terima kasih ngagai Petara lalu nadai ngangauka Petara enggau Bunsu Antu datai ngabang datai nandang, datai makai datai nandai, bebai pengaruh chukup mayuh nadai ke timpang, bebai ubat serangkap genap bisi magang,” pia ku penemu iya.
Tang taja pan baka nya ku Johnny madah, bansa bukai enda tau diasuh miring enti piring nya dikena bebabi (babi dibunuh lalu ati tauka atau babi nya dipeda dikena bechenaga) maya begawai kenyalang begawai kelingkang, beteresang mansau besandau liau, ijuk pumpung begawai lesung, begawai raya begerasi papa baka piring Petara kasih, piring ngambi Raja Nabau ngabang, piring ngambi Raja Remaung ngabang, piring Indai Abang, piring tanam tauka piring pun pandung, piring tasak, piring Sengalang Burung, piring Keling, piring Burung Malam, piring babi, piring empukung tauka piring antu pala, piring ngalu Petara tauka piring ngalu antu sereta piring ti bekaul ke bukai.
“Kebuah pia, laban ba pengawa ke baka tu orang ti miring enggau orang ti megai pengawa sigi udah dipilih orang ti empu gawai.
“Reti iya enti tuju piring nya bisi bekaul enggau jalai pengarap asal kitai Iban, piring nya enda tau dikereja orang sengapa tauka bansa bukai ti ukai sejalai pengarap (pengarap asal) enggau bansa Iban,” ku iya madahka baru.
Nyelepak jaku iya, ku Nalong, agi kelia, orang ke dipilih megai pengawa ke baka tu enda tau orang sebarang enti ukai orang ke sigi pugu kalu menua, raja berani, bujang berani, orang ke pangkat manuk sabung manuk pukung, orang ke petang pah kiba, betelaga di baruh tapa lalu ukai mega orang ke purih ulun laban kenu ku sida ke tuai ti masai megai adat asal kitai Iban, Petara enggai makai piring ke dipiringka orang purih ulun.
“Amat tauka enda utai tu, enda mih kitai nemu. Nya mih kebuah Iban kelia bejimat amat lebuh milih orang ke megai pengawa lalu enti ulih sida iya sigi nyelinting orang ke baka paku temu gelung, baka tubu temu rebung, baka kulat temu tuchung, baka jala temu sambung enggaika pengawa (gawai) enggau piring sida iya enda dikemuningka Petara,” ku iya madah.
Tang taja pan baka nya, ku iya, penemu seduai pasal ngasuh tauka maduka bansa bukai miring dalam sekeda pengawa ke diintu bansa kitai Iban tu tau diseruri, tau diseleti, tau ditubu lalu tau mega disakal nitihka pematut.