KERING SEMENGAT: Lemambang Jalani (dua ari kanan) ngetup besi (ilang) dikena ngelai pengering semengat sereta nulak semua penyai maya pengawa nya. Bela bisi ba pengawa nya Jimbun (tengah) enggau Igai (dua ari kiba). — Gambar Wilfred Pilo
KUCHING: Empat igi keruntuk munsuh Rajah Brooke kelia ke disimpan di Kubu Magherita udah dipiring ensana ngambika tau dipindah ngagai Museum Sarawak.
Pengawa miring sereta mindahka keruntuk ke diuluka Sapit Pemansik, Kunsil Adat Bansa Asal Sarawak (MAIS) Jimbun Tawai mada ngagai The Borneo Post, bepun ari atur ngemanahka kubu nya dia semua keruntuk munsuh Rajah nya kelia dipindah ngena adat basa ngambika semengat sida enda bekesegau ngachau mensia.
“Ba pengawa miring tu, semina lemambang ke landik tau nyampi sereta nimang bujang berani ke lesi ketegal jai mimpi tauka burung maya betempuh enggau soldadu Rajah kelia,” ku iya.
“Semua piring ading, asi tumpi, pinang sirih, semakau, tuak arak, genselan sereta utai bukai bisi disedia magang, diengkah ba keresang sereta ditepu dalam benda udah digitang enggau sampui ngambika semengat orang ke ngempu keruntuk nya enda ringat lalu lantang belama,” tandu iya.
Iya mega madah, semina lemambang ke pandai sereta landik aja tau ngereja pengawa mindahka keruntuk nya.
Tambah mega enti orang ke ngereja nya enda chukup piring sereta mipis dinding bulu dia iya deka alah ayu tauka lemi semengat.
Keruntuk nya ku iya, dipelabaka dibai raban polis bansa Iban ke ngarika perintah Brooke pemulai sida bejalaika pengawa pengelikun nyidi munsuh diasuh perintah Brooke menya.
Lebuh ba kubu nya, keruntuk nya digitang dalam ringka ba sebengkah bilik.
Jimbun madah, sepenembu kubu nya dikemanah ila, keruntuk nya deka dibai pulai baru ngagai Kubu Magherita. Maya nya mega pengawa miring deka diatur tang enda semesai keterubah mindah ari kubu nya ngagai Museum Sarawak.
Bela bisi ngemataka pengawa miring nya, pemesai ari Museum Sarawak enggau Opis Adat Pesaka Bansa.
Konsultan pengawa ngemanah kubu nya Mike C.K. Boon madah, pengawa miring nya diatur laban kitai bebasa sereta ngemeratka adat bansa asal peranak menua ditu.
Kubu ba seberai indu nengeri Sarawak digaga ba taun 1879 maya perintah Rajah ke-dua Charles Brooke nyadi palan endur ngetanka Kuching ari serang munsuh.
Pengudah ditinggalka perintah Brooke, kubu nya nyadi Museum Polis berengkah ari taun 1971.
Berindik ari nya, kubu nya suah dilawa temuai ari menua tasik.
Ba taun 2007 kubu nya ditutup ngambika pengawa ngemanah ulih dipejalai. Berengkah 5 Oktober 2012 tu tadi, atur ngemanahka kubu ngena ungkus RM2 miliun udah berengkah sereta dipelaba tembu ujung taun 2013.