54 iku nerima geran ari KTS Foundation

0

KUCHING: Lima puluh empat iku nembiak sekula ari serata menua  benasit endar laban dipilih nerima geran dikena maya tebuka sekula taun baru tu ila, ari sebuah kompeni besai KTS.

Geran KTS Foundation keterubah iya diberi kelala dalam taun 2009 ungkup nembiak sekula secondari ke nyulut di Sarawak.

Nembiak sekula ke (layak) nerima geran sekula ari KTS, iya nya nembiak sekula ke nyulut dalam peresa lalu ari ruang bilik ke nadai kurang pemisi.

Geran RM200 diberi ngagai nembiak sekula tu nyengkaum diberi pechuma surat berita Utusan Borneo tauka See Hua Daily News dalam kandang setaun.

“Tuju ke batang mantu nembiak baka tu, laban mantu ngurangka penanggul wang apai indai, sereta meransang nembiak bebendar agi dalam akdemik sida iya,” ku Area Menijer, See Hua Marketing, Wong Sing Seng ti mega nyadi kaban komiti tu, maya nyuaka geran tu di Auditorium, Crown Towers ba Jalai Pending ditu, kemari.

Taun tu, urung 177 iku nembiak sekula ari 62 buah sekula ke dipilih nerima geran tu.

KTS Foundation ukai semina nyendiaka geran dikena nembiak sekula secondari, tang mega sekulasip ungkup nembiak ke deka masuk universiti kelebih agi ungkup anak penegreja pengawa kompeni  KTS nyengkaum anak orang ke endang klien surat berita kompeni  tu – Utusan Borneo, The Borneo Post enggau See Hua Daily News.

Antara nembiak sekula ke benasit endar bisi dikerandau maya nerima geran tu, iya nya, siku anak orang berikan, Lavina anak Jidy, 14, SMK Sg Tapang berterima kasih ngagai KTS Foundation laban meri bantu ke baka tu.

“Geran tu kena aku meli perengka kena sekula, lalu pengawa KTS Foundation tu sigi manah laban ngurangka penusah apai indai bebelika barang kena sekula,” ku Lavina ke bisi seiku agi menyadi ke benung besekula.

Ba Florence Meredith anak Martin, 13, SMK Lubok Antu mega madahka pengaga ati iya bulih geran nya ke deka dikena iya meli bup sereta kereban sekula.

“KTS Foundation chukup betatika nasit nembiak sekula baka kami,” ku iya.