Pengawa bandau nulang pedis diketuka laban maya ke diatu bedau bisi atur ke engkeman
SIBU: Pengawa engkubang pendam enda ulih diketu nyema nadai atur ti engkeman tauka berat agi ditengkebang.
Pemancha Stanley Geramong madah, atur tauka undang-undang ke diatu apin ulih ngemutarka penyalah nya.
“Nyema sida ke engkubang nya ditangkap lalu endang ditemu salah, sida semina ditunggu aja.
“Aku pechaya, pengawa nunggu pengereja penyalah tu apin tau ngemunaska penyalah engkubang pendam,” pia ku iya madah.
Iya bejaku munyi nya maya dikerandau kemari bekaul enggau pengawa nyengkubang ba Pendam Iban di Bukit Aup ditu, empai lama tu tadi.
Nitihka dipadah penusah nya udah ditemu dua minggu ke udah tang ripot polis digaga hari Lima tu tadi.
Ku Stanley, ngelama tu ukum dipejalaika bepelasarka atur bekaul enggau penyalah enchuri baya aja.
Laban udah nyadi baya barang nya nadai guna agi ba sida sebilik.
“Nya alai, ukum ti dipejalaika enda bangat berat laban penyalah sida semina nitihka penyalah enchuri barang ke udah dibuai,” ku iya madah.
Taja pan baka nya, ku iya, nadai atur ti nyemetak mutarka penyalah nya ukai ketegal bala tuai dulu suba laban dulu suba pengawa nyengkubang pendam enda kala nyadi lalu semina dikereja jelu aja.