KUCHING: Penanyi baru Dayak, Rannee Pat udah sedia napi Anugerah Muzik Dayak (DAMA) 2012 ti deka diatur kenaka 24 November tu di DeTAR UNIMAS.
Iya ti deka bepekit ngerebut tiga kategori ngarapka sukung ari semua peminat sereta album ‘Tua Semina Bepangan’ ti dipansutka ba bulan Disember 2011 suba tau mai tuah ngagai iya.
Bedau lama tu tadi, penanyi peranak Bidayuh (Selako) ari Kampung Sedaing, Sematan tu udah ngelancharka ‘Rannee Pat Fan Club’ ti diatur enggau tuju meri basa ngagai semua peminat ti udah nyukung iya ngelama tu.
Diatur ba sebuah palan ngelantang ati ‘Langgak’, pengawa nya digulu raban OCH Sound Production (OCSHP), bala artis Dayak, DJ radio sereta peminat Rannee.
Baju ‘Rannee Pat Fan Club’ bisi mega disadung ba pengawa malam nya.
“Ngarapka ‘Rannee Pat Fan Club’ ulih ngerapitka kaul aku enggau semua peminat sereta tau matak mayuh agi peminat begulai enggau aku.
“Sukung ari semua peminat mega dikearap tau mai pemujur maya malam DAMA 2012 tu ila,”ku iya.
Iya ke benung merambu ngaga album kedua dalam awak ke semak tu perchaya industri muzik Dayak tau maju sebaka enggau muzik bukai enti diadu nitihka chara ti betul ke alai iya ngansak semua besaup ngemunaska CD/VCD chelak.
Rannee Pat seiku artis ti beserakup dalam OCSHP begulai enggau tiga iku artis bukai baka Donny Lang, Jessica Remaya sereta Lees Zwita.
Ba DAMA 2012, Rannee deka bepekit dalam kategori ’Artis Baru Tebilang’, ‘Kulit Album Pengabis Manah’ enggau ‘Artis Pop Kreatif Tebilang’.
Iya mega diberi awak mantaika sera nyawa lagu Aus Pengerindu Ketegal Nuan di atas panggau DAMA 2012 malam nya ila.
Donny Lang mega nyadi pengari kedua OCSHP ba pekit malam nya. Iya bepekit dalam empat kategori iya nya Artis Lelaki Tebilang, Kulit Album Pengabis Manah, Susun Muzik Pengabis Manah sereta Video Pengabis Manah.
Bela datai ngerami Menijer OCSHP Oliver Christy Henry enggau Sapit Menijer Gibbson Richard.