Tuesday, August 16

Indai tunggal di menua tu tau ngerejister diri ba JKMS tauka Biro Indu: Lawson

0

KUCHING: Mayuh palan endur indai tunggal ngerejister diri sereta ngulihka bantu perintah lebih agi nengah Opis Pengintu Pengelantang Raban Bansa (JKMS) kelimpah ari Opis Biro Indu.

Menteri Muda Pengintu Pengelantang, Robert Lawson Chuat madah indai tunggal tau datai ngagai sebarang opis JKMS ti bisi di serata menua Sarawak.

Biro Indu nyadi sebuah ijinsi ngerejister profil indai tunggal ke begunaka indai tunggal ngisi pom ti bisi disediaka Biro nya.

“Penerang ti diisi indai tunggal dipasuk ke dalam sistem ‘data profil’ nyaup mantu indai tunggal nya ngambika muntang disidi jemah ila,” ku iya.

Chuat madah baka tu lebuh nyaut tanya tambah ari ADUN Lambir Ripin Lamat ke deka nemu enggau silik pasal bantu ke indai tunggal di sitak menua sida (Lambir) lebuh sesi tanya-saut Aum Kedua ke Penggal Kedua, Aum Kunsil Nengeri ke-17, hari ke-3, ba DUN ditu, kemari.

Chuat madah naka ke diatu, bisi empat buah NGO ke bisi direjister enggau JKMS, ke ulih alai indai tunggal minta bantu, iya nya Gerempung Indai Tunggal Sarawak, Carnations, Gerempung Indai Tunggal Menua Tengah, Sibu enggau Kelab Pengintu Pengelantang Harmony, Miri.

“JKMS nyendia bantu ninting bulan ngagai indai tunggal ke kurang penatai pemisi sereta ba garis seranta, iya nya RM830 sebulan, baka bantu nembiak, bantu orang tuai enti berumur lebih 60 taun enggau bantu OKU,” ku iya.

Kelimpah ari bantu ninting bulan, JKMS ngemeratka pengintu pengelantang ke produktif ke indai tunggal ke agi ulih gawa enggau chara meri bantu dalam perengka guna ke ulih nambah pemisi sida iya, baka nulung meli injin jait, injin kena ngaga kuih enggau perengka guna bukai dalam RM5,000 ke bisi disediaka.

Biro Wanita mega bisi nyendiaka pengawa pemansang kena indu ke begunaka bantu, enggau chara ngatur kos nyendiaka sida iya dalam pengawa pengelandik, ke ulih dikena ngangkatka pengelandik sida iya lebih agi indai tunggal.

“Pengawa dagang ke ulih dikereja indai tunggal ke ulih nambah pemisi sida iya, iya nya baka pemakai, pengelandik jari, bejait enggau sekeda pengawa bukai,” ku iya.

Ba sitak Miri ku Chuat, urung 220 iku indai tunggal udah ngereister diri enggau PITSA Miri, lalu semina dua iku aja ari Lambir.

Naka 31 Oktober taun tu, urung 46 iku indai tunggal udah nerima bantu ninting bulan ari JKMS, 33 iku nerima bantu nembiak (BKK), lalu 13 iku agi nerima barang bantu tauka BA.

Kelimpah ari nya, urung enam iku indai tunggal di sitak Lambir udah diberi bantu nengah program 1AZAM.