SIBU: Sangkai Temuai Pub & Karaoke (Estee) ba No.5 Jalai Tukang Besai ditu deka ngatur mayuh bengkah program ngerinduka ati beserimbai enggau pengerami nyambut kedua taun iya udah ditumbuh kena lemai pagila (29 November).
Nitihka dipadah pengari komiti pengerami Aida Yasmin, program deka belabuh pukul 9.30 lemai kelimpah disempulang pekit Miss Estee enggau tikit benasit.
“Pekit Miss Estee tebuka ngaga semua lalu semina mayar RM20 seiku. Taja pan baka nya bala pemekit mesti ngena ‘Evening Gown’.
“Champian pekit tu deka mai pulai perais mata duit RM500, lalu lumur dua RM300 enggau lumur tiga RM200,” pia ku iya madah ngagai pengarang berita, kemari.
Bekenangka perais ungkup tikit benasit, ku Aida, perais lumur satu iya nya sebuah mutosikal Modenas lalu lumur dua iya nya televisyen skrin nipis 42 inchi enggau sebuah peti ais.
“Kitai mega bisi nyendiaka perais tiga iti telefon binching enggau tiga buah hamper,” ku iya madahka baru.
Nambahka nya, ku iya, siti kupun tikit benasit tu ulih diambi enti meli 24 tin bir.
“Enggau tu aku ngelalauka semua penatai mensia mayuh ngulu program ke diatur kami tu lemai pagila,” ku iya.
Mensia mayuh ti deka nemu penerang silik tau betelefon ngagai Aida empu nengah lumur 019-4837272.