Site Last Updated 2:33 pm, Wednesday

Sukung meh Anugerah Muzik Dayak

Posted on November 28, 2012, Wednesday

Ba AMD 2012 tu tadi, penyereta ari kompeni rekoding enggau artis bisi kusut

KUCHING: Gerempung ukai dikuasa perintah tauka NGO Persatuan Penggiat Seni dan Kebudayaan Dayak (PPSKD) kemari minta sukung ke jelan agi ba Anugerah Muzik Dayak 2012 (AMD 2012).

Sapit Chairman PPSKD Isa Lee, seiku ari penyampai ba AMD 2012 kena malam Hari Enam tu tadi madahka, iya bisi beratika pengusut penyereta ari kompeni rekoding.

Ku iya utai tu enda manah ungkup industri muzik Dayak enti majak nyadi.

Tang taja pia puji diberi ngagai Panggau Buluh Pengerindu (PBP), OCH Sound Production (OCHSP), Begulai Sejalai Production (BSP), All Time Best, Seventh Tribe enggau sida bukai ke bisi nganjung penyereta, ku iya.

“Kompeni rekoding diperansang nganjung entri kita. Enda sebaka enggau di Semenanjung Malaysia, ditu di Sarawak penyereta nya enda bebayar. Taja pan kitai teulihka video pengambis manah, kulit album, lirik, tusun muzik enggau ke bukai, kitai (Dayak) mengkang enda ulih matak mayuh raban enti tebal agi artis enggau kompeni rekoding ngagai pengawa besai tu,” ku iya.

“Tu pulaika enda manah ngagai industri Muzik Dayak laban agi tebal ari kitai nya enda nyukung sereta bekerejasama enggau industri tu,” ku iya.

Taja pia, Isa meri tabi ngagai Gerempung Pemuzik enggau Artis Dayak (DAMA) ke udah ngatur renggat ke tiga AMD nya kena malam Hari Enam tu tadi ba DeTAR Putra Unimas ditu.

Kali keterubah diatur AMD, dikumbai DAMA diatur ba Hotel Riverside Majestic ditu dalam taun 2008.

Kali kedua diatur nya dalam taun 2010 ba Palan Borneo Konvensyen Kuching (BCCK), bisi 15 gelar diperebutka lalu enam gelar nya dipelanja Celcom.

Dalam AMD 2012 bisi 19 bengkah kategori diperebut enggau nambah empat kategori baru, iya nya Gelar Khas DAMA, Artis Balada Tebilang, Artis Kreatif Pop Tebilang enggau Artis Rock Tebilang.

“Penyereta AMD 2012 semina ari kompeni rekoding baru Dayak. Pengarap aku nya mayuh kelebih agi artis muai runding “kiasu” (nanggika alah) ngambika indsutri muzik kitai mansang seraya produk deka betambah manah,” ku Isa.

“Diatu nya DAMA betapi enggau pemar matak mayuh agi kompeni rekoding ngambi bagi dalam Anugerah Muzik Dayak laban nya sebengkah tuju gerempung nya ditumbuhka dalam taun 2010,” ku iya nambah.

Print Friendly

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Comments are closed.