Pemanah rampa menua patut dikemerat: Adenan

0

KUCHING: Pengereja pengawa Opis Pengeraja Asal enggau Rampa Menua (NREB) dilalau bebendar agi neritka atur bepelasarka undang-undang ke udah ditetapka.

Menteri ba Opis Kepala Menteri Tan Sri Datuk Adenan Satem madah, undang-undang ba pekara rampa menua patut dipejalai nitihka pematut ketegal nya deka ngintu pemaik rampa menua maya napi atur pemansang ti enda ulih diseliah sereta benung chakah dipejalai.

Berindik ari nya , Adenan ke mega Chairman NREB ngansak semua pengereja pengawa ijinsi nya nyikap diri enggau penemu ngambika isu rampa menua ke nyadi isu global ulih ditapi enggau engkeman.

“Sikap diri enggau penemu baru senentang chara ngintu pemaik rampa menua ke alai nengah penemu nya kitai ulih nemu nama pekara ti deka nyadi jemah ila.

“Tiap pemansang ti dipejalai deka ngubah gaya rampa menua lalu kitai pengereja pengawa ba ijinsi tu patut nemu mida bagi pengawa ti tau mulaika pemaik tauka ngeruga pemanah rampa menua,” ku iya.

Berindik ari nya, undang-undang ti udah diungkupka ngagai pengawa tu patut diterit, tandu iya.

Iya mansutka jaku tu ba pengerami bejadi program Aum ke-2 Pemesai NREB 2012 ti diatur dua hari berunggu berengkah kemari ba sebengkah hotel ditu, kemari.

Iya mega netapka NREB patut ngadaka kaul sereta randau enggau menua ti besendi ngambika isu ngintu pemaik rampa menua tu ulih diadu nengah chara ti lebih engkeman.

Ambika chunto, ku iya. . .kitai enda ulih nagang sebun angin ngetu di garis entara menua, berindik ari nya kededua menua ti besendi patut bisi kaul ti manah ngambika gaya rampa menua muntang agi diintu.

“Semua rayat megai tanggungpengawa ngintu pemaik rampa menua, taja pan seiku tang enti digempuru deka nyadi siti sada ti ngasi dipending.

“Aku perchaya kitai udah ngereja semua pengawa tu tang iya ke pemadu beguna amat iya kitai patut nerenakka pemereti ati senentang guna ngintu rampa menua ngagai tiap iku orang,” ku iya.

Bela bisi datai ngulu pengawa nya Controller Kualiti Rampa Menua Peter Sawal enggau sapit iya Paul Ponar, raban pemesai opis NREB enggau orang bukai.